سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تین خصلتیں ایسی ہیں کہ جس میں وہ ہوں گی اس نے ایمان کا ذائقہ چکھ لیا: وہ شخص جس کے نزدیک اللہ اور اس کے رسول صلی اللہ علیہ وسلم سے بڑھ کر کوئی چیز محبوب نہ ہو، وہ شخص جس کے لیے آگ میں جلایا جانا اپنے دین سے پھر جانے سے زیادہ محبوب ہو، اور وہ شخص جو اللہ ہی کے لیے محبت کرے اور اللہ ہی کے لیے بغض رکھے۔“
امام طبرانی رحمہ اللہ فرماتے ہیں: ”نعیم رحمہ اللہ نے سیدنا انس رضی اللہ عنہ سے اس کے علاوہ کوئی حدیث روایت نہیں کی، اور ان کا لقب «المجمر» اس لیے پڑا کیونکہ وہ رسول اللہ صلی اللہ علیہ وسلم کی قبر مبارک پر خوشبو کی دھونی دیا کرتے تھے، اور وہ سیدنا عمر بن خطاب رضی اللہ عنہ کے آزاد کردہ غلاموں میں سے ہیں، اور اس حدیث کو ابن الحویرث رحمہ اللہ سے صرف موسیٰ رحمہ اللہ نے روایت کیا ہے، اور ابن ابی مریم رحمہ اللہ اسے بیان کرنے میں منفرد ہیں۔“ [المعجم الأوسط/باب العين/حدیث: 4905]