سیدنا عبداللہ بن عباس رضی اللہ عنہما بیان کرتے ہیں کہ ایک اعرابی نبی صلی اللہ علیہ وسلم کے پاس آیا اور کہنے لگا: ”میں کس چیز سے جانوں کہ آپ اللہ کے رسول ہیں؟“ آپ صلی اللہ علیہ وسلم نے فرمایا: ”بتاؤ، اگر میں کھجور کے اس درخت سے اس خوشے کو بلاؤں تو کیا تم گواہی دو گے کہ میں اللہ کا رسول ہوں؟“ اس نے کہا: ”جی ہاں۔“ چنانچہ آپ صلی اللہ علیہ وسلم نے خوشے کو بلایا تو وہ درخت سے اترنے لگا، یہاں تک کہ زمین پر آ گرا، پھر وہ اچھلتا کودتا نبی صلی اللہ علیہ وسلم کے پاس آ پہنچا۔ آپ صلی اللہ علیہ وسلم نے اس سے فرمایا: ”واپس چلا جا۔“ تو وہ لوٹ گیا اور اپنی جگہ پر جا لگا۔ تب اعرابی نے کہا: ”میں گواہی دیتا ہوں کہ اللہ کے سوا کوئی معبود نہیں اور بے شک آپ اللہ کے رسول ہیں۔“
امام طبرانی رحمہ اللہ فرماتے ہیں: ”اس حدیث کو سماک سے شریک کے سوا کسی نے روایت نہیں کیا۔“ [المعجم الأوسط/باب الميم/حدیث: 5068]