سیدنا عمر رضی اللہ عنہ سے روایت ہے کہ جب رسول اللہ صلی اللہ علیہ وسلم کی وفات ہو گئی تو میں اور سیدنا ابوبکر رضی اللہ عنہ، سیدنا علی رضی اللہ عنہ کے پاس آئے اور ہم نے کہا: ”رسول اللہ صلی اللہ علیہ وسلم نے جو کچھ ترکے میں چھوڑا ہے اس کے بارے میں آپ کی کیا رائے ہے؟“ انہوں نے کہا: ”ہم سب لوگوں سے بڑھ کر رسول اللہ صلی اللہ علیہ وسلم کے اور آپ صلی اللہ علیہ وسلم کے چھوڑے ہوئے مال کے حق دار ہیں۔“ میں نے کہا: ”اور جو خیبر میں ہے؟“ انہوں نے کہا: ”اور جو خیبر میں ہے۔“ میں نے کہا: ”اور جو فدک میں ہے؟“ انہوں نے کہا: ”اور جو فدک میں ہے۔“ تو میں نے کہا: ”سنو! اللہ کی قسم! جب تک تم ہماری گردنیں آروں سے نہ کاٹ ڈالو (ہم یہ تسلیم نہیں کریں گے)، ہرگز نہیں!“
امام طبرانی رحمہ اللہ فرماتے ہیں: ”ان دونوں حدیثوں کو زید بن اسلم رحمہ اللہ سے ہشام بن سعد کے سوا کسی نے روایت نہیں کیا، اور ہشام سے موسیٰ بن جعفر جعفری کے سوا کسی نے روایت نہیں کیا؛ ان دونوں کو روایت کرنے میں محمد بن علی بن خلف عطار منفرد ہیں۔“ [المعجم الأوسط/باب الميم/حدیث: 5339]