سیدنا ابوہریرہ رضی اللہ عنہ سے روایت ہے کہ نبی صلی اللہ علیہ وسلم لوگوں کی طرف متوجہ ہوئے اور فرمایا: ”اسی دوران کہ ایک شخص ایک گائے ہانک رہا تھا اور اس نے اس پر سواری کرنے کا ارادہ کیا، تو وہ (گائے) اس کی طرف متوجہ ہوئی اور کہنے لگی: ہمیں اس مقصد کے لیے پیدا نہیں کیا گیا، بلکہ ہمیں تو صرف کھیتی باڑی کے لیے پیدا کیا گیا ہے۔“ پاس موجود لوگوں نے (حیرت سے) کہا: «سبحان الله»، گائے نے کلام کیا! تو رسول اللہ صلی اللہ علیہ وسلم نے فرمایا: ”میں اس پر ایمان لاتا ہوں اور سیدنا ابوبکر رضی اللہ عنہ اور سیدنا عمر رضی اللہ عنہ بھی (ایمان لاتے ہیں)“ حالانکہ وہ دونوں وہاں موجود نہ تھے۔
پھر آپ صلی اللہ علیہ وسلم نے فرمایا: ”ایک شخص نے بتایا: اس دوران کہ میں اپنی بکریوں کو چرا رہا تھا کہ اچانک ایک بھیڑیا آیا اور اس نے ایک بکری پکڑ لی، میں نے اس کا پیچھا کیا اور وہ بکری اس سے چھین لی، تو اس (بھیڑیے) نے کہا: درندوں والے اس دن تم کیا کرو گے جس دن میرے سوا ان کا کوئی چرواہا نہ ہو گا؟“ لوگوں نے کہا: «سبحان الله»، بھیڑیے نے کلام کیا! تو رسول اللہ صلی اللہ علیہ وسلم نے فرمایا: ”میں اس پر ایمان لاتا ہوں اور سیدنا ابوبکر رضی اللہ عنہ اور سیدنا عمر رضی اللہ عنہ بھی (ایمان لاتے ہیں)“ حالانکہ وہ دونوں وہاں موجود نہ تھے۔
عبید اللہ بن عمر رحمہ اللہ سے اس حدیث کو محمد بن عیسیٰ بن سمیع رحمہ اللہ کے علاوہ کسی نے روایت نہیں کیا۔ [المعجم الأوسط/باب الميم/حدیث: 6785]