سیدنا جابر رضی اللہ عنہما سے روایت ہے کہ ان کے والد کے ذمے کھجوروں کے کچھ وسق (قرض) تھے، تو ہم نے اس (قرض خواہ) شخص سے کہا: ”تم ہمارے نخلستان کا پھل لے لو“، لیکن اس نے انکار کر دیا، پھر رسول اللہ صلی اللہ علیہ وسلم تشریف لائے اور آپ صلی اللہ علیہ وسلم کے ساتھ سیدنا عمر رضی اللہ عنہ بھی تھے، آپ صلی اللہ علیہ وسلم نے ہمارے لیے اس میں برکت کی دعا فرمائی، چنانچہ ہم نے کھجوریں توڑیں اور اس شخص کا جتنا بھی حق تھا اسے پورا ادا کر دیا، جبکہ ہمارے نخلستان کی کھجوروں کا تخمینہ اپنی جگہ ویسے ہی برقرار رہا، پھر میں رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کو اس کی خبر دی تو آپ صلی اللہ علیہ وسلم نے فرمایا: ”سیدنا عمر رضی اللہ عنہ کو بتاؤ۔“
میں نے انہیں بتایا تو انہوں نے عرض کی: ”یا رسول اللہ! میں جانتا تھا کہ جب آپ صلی اللہ علیہ وسلم ان کے لیے اس میں برکت کی دعا فرمائیں گے تو یقیناً اس میں برکت دی جائے گی۔“ [المعجم الأوسط/باب الألف/حدیث: 726]