سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے تین ایسے بچے آگے (آخرت میں) بھیج دیے جو ابھی بلوغت کو نہیں پہنچے تھے، وہ اس کے لیے جہنم سے بچاؤ کا مضبوط قلعہ بن جائیں گے۔“ اس پر سیدنا ابو الدرداء رضی اللہ عنہ نے عرض کیا: ”میں نے دو بچے آگے بھیجے ہیں۔“ آپ صلی اللہ علیہ وسلم نے فرمایا: ”اور دو بھی (اسی طرح ہیں)۔“ پھر سیدنا ابی بن کعب رضی اللہ عنہ نے، جو قراء کے سردار تھے، عرض کیا: ”میں نے ایک بچہ آگے بھیجا ہے۔“ آپ صلی اللہ علیہ وسلم نے فرمایا: ”اور ایک بھی (اسی طرح ہے)، لیکن یہ اجر اس صورت میں ہے جب صدمے کے پہلے جھٹکے کے وقت صبر کیا جائے۔“
امام طبرانی رحمہ اللہ فرماتے ہیں: ”اس حدیث کو ابو عبیدہ سے ابو محمد مولیٰ عمر کے سوا کسی نے روایت نہیں کیا، اور عوام بن حوشب اسے روایت کرنے میں منفرد ہیں۔“ [المعجم الأوسط/باب الميم/حدیث: 7868]