سیدنا جابر رضی اللہ عنہما بیان کرتے ہیں: ”میں رسول اللہ صلی اللہ علیہ وسلم کے ساتھ انصار کی ایک عورت کے ہاں گیا، اس نے آپ صلی اللہ علیہ وسلم کے لیے کھجور کی ٹہنیوں (یا جڑوں کا بچھونا) بچھایا اور آپ صلی اللہ علیہ وسلم کے لیے ایک بکری ذبح کی۔ ہم اسی حال میں تھے کہ رسول اللہ صلی اللہ علیہ وسلم نے فرمایا: ”تمہارے پاس ایک جنتی آدمی ضرور آئے گا۔“ تو سیدنا ابوبکر صدیق رضی اللہ عنہ آ گئے۔ پھر آپ صلی اللہ علیہ وسلم نے فرمایا: ”تمہارے پاس ایک جنتی آدمی ضرور آئے گا۔“ تو سیدنا عمر بن خطاب رضی اللہ عنہ آ گئے۔ پھر آپ صلی اللہ علیہ وسلم نے فرمایا: ”تمہارے پاس ایک جنتی آدمی ضرور آئے گا، اے اللہ! اگر تو چاہے تو اسے علی کو بنا دے۔“ تو سیدنا علی بن ابی طالب رضی اللہ عنہ آ گئے۔ پھر ہمارے پاس کھانا لایا گیا، ہم نے کھایا، پھر ہم اٹھے اور ظہر کی نماز پڑھی اور وضو نہیں کیا، پھر ہم اپنے بچے ہوئے کھانے کی طرف لوٹے اور کھایا، اور رسول اللہ صلی اللہ علیہ وسلم نے نیا وضو نہیں کیا اور نہ ہم میں سے کسی نے۔“
امام طبرانی رحمہ اللہ فرماتے ہیں: ”اس حدیث کو یحییٰ بن سعید سے ابن سمعان کے سوا کسی نے روایت نہیں کیا، اس میں جارود بن یزید منفرد ہیں۔“
دار الحرمین کے نسخے میں اسی طرح (الخضر بن آدم) ہے، اور غالباً درست ”أصرم“ ہے، اور دار الحرمین کے محقق نے اس پر تنبیہ کی ہے۔ [المعجم الأوسط/باب الميم/حدیث: 7897]