سیدنا انس رضی اللہ عنہ سے روایت ہے کہ سیدنا ابوبکر صدیق رضی اللہ عنہ رسول اللہ صلی اللہ علیہ وسلم کے ساتھ کھانا کھا رہے تھے کہ آپ صلی اللہ علیہ وسلم پر یہ آیت نازل ہوئی: ﴿فَمَنْ يَعْمَلْ مِثْقَالَ ذَرَّةٍ خَيْرًا يَرَهُ وَمَنْ يَعْمَلْ مِثْقَالَ ذَرَّةٍ شَرًّا يَرَهُ﴾ تو سیدنا ابوبکر رضی اللہ عنہ نے اپنا ہاتھ روک لیا اور عرض کیا: ”اے اللہ کے رسول صلی اللہ علیہ وسلم ! کیا میں اپنے کیے ہوئے ذرہ برابر برے عمل کو بھی دیکھ لوں گا؟“ تو آپ صلی اللہ علیہ وسلم نے فرمایا: ”اے ابوبکر! دنیا میں جو ناپسندیدہ باتیں تمھیں پیش آتی ہیں، یہ ذرہ برابر برائیوں کا بدلہ ہی تو ہیں، اور ذرہ برابر نیکیاں تمھارے لیے محفوظ رکھی جاتی ہیں یہاں تک کہ قیامت کے دن تمھیں ان کا پورا بدلہ دیا جائے گا۔“
امام طبرانی رحمہ اللہ فرماتے ہیں: ”اس حدیث کو ایوب رحمہ اللہ سے سماک بن عطیہ رحمہ اللہ کے سوا کسی نے روایت نہیں کیا، اور سماک رحمہ اللہ سے ہیثم رحمہ اللہ کے سوا کسی نے روایت نہیں کیا، اس میں زیاد بن یحییٰ رحمہ اللہ منفرد ہیں۔“ [المعجم الأوسط/باب الميم/حدیث: 8407]