سیدنا انس بن مالک رضی اللہ عنہ سے روایت ہے کہ انصار کے جن دو آدمیوں کے گھر رسول اللہ صلی اللہ علیہ وسلم کی مسجد سے سب سے زیادہ دور تھے، وہ سیدنا ابو لبابہ بن عبدالمنذر رضی اللہ عنہ تھے، جن کا گھر قبا میں تھا، اور سیدنا ابو عبس بن جبر رضی اللہ عنہ، جن کی رہائش بنو حارثہ میں تھی۔ یہ دونوں رسول اللہ صلی اللہ علیہ وسلم کے ساتھ عصر کی نماز پڑھتے، پھر اپنی قوم کے پاس پہنچتے تو رسول اللہ صلی اللہ علیہ وسلم کے عصر جلدی ادا فرمانے کی وجہ سے ان کی قوم نے ابھی نماز نہ پڑھی ہوتی تھی۔
امام طبرانی رحمہ اللہ فرماتے ہیں: ”یہ حدیث عاصم بن عمر بن قتادہ سے محمد بن اسحاق کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 7946]

سیدنا عقبہ بن عامر رضی اللہ عنہ سے روایت ہے، وہ بیان کرتے ہیں: ”میں بارہ سواروں کے ساتھ آیا، یہاں تک کہ ہم رسول اللہ صلی اللہ علیہ وسلم کے ہاں پہنچ گئے۔ میرے ساتھیوں نے کہا: ’کون ہمارے اونٹ چرائے گا تاکہ ہم رسول اللہ صلی اللہ علیہ وسلم سے علم حاصل کرنے چلے جائیں، پھر جب وہ شام کو لوٹے تو ہم اسے وہ سب سنا دیں جو ہم نے رسول اللہ صلی اللہ علیہ وسلم سے سنا ہے؟‘ میں نے کہا: ’میں (چراتا ہوں)۔‘ پھر میں نے اپنے دل میں سوچا: شاید میں گھاٹے میں ہوں، کیونکہ میرے ساتھی وہ باتیں سن رہے ہیں جو میں نبی اللہ صلی اللہ علیہ وسلم سے نہیں سن پاتا۔ چنانچہ ایک دن میں حاضر ہوا تو میں نے ایک آدمی کو یہ کہتے سنا: ’نبی اللہ صلی اللہ علیہ وسلم نے فرمایا: جس نے کامل وضو کیا، پھر اپنی نماز کے لیے کھڑا ہوا تو وہ اپنے گناہوں سے اس دن کی طرح (پاک) ہو جاتا ہے جس دن اس کی ماں نے اسے جنا تھا۔‘ مجھے اس بات پر بڑا تعجب ہوا تو سیدنا عمر بن خطاب رضی اللہ عنہ نے فرمایا: ’اگر تم دوسری بات سنتے تو اس سے بھی زیادہ تعجب کرتے۔‘ میں نے عرض کیا: ’اللہ مجھے آپ پر قربان کرے، وہ بات مجھے بھی دہرا کر سنا دیجیے۔‘ تو سیدنا عمر بن خطاب رضی اللہ عنہ نے فرمایا: ’نبی اللہ صلی اللہ علیہ وسلم نے فرمایا: جو شخص اس حال میں فوت ہو کہ وہ اللہ تعالیٰ کے ساتھ کسی چیز کو شریک نہ ٹھہراتا ہو، اس کے لیے جنت کے دروازے کھول دیے جاتے ہیں، وہ جس دروازے سے چاہے داخل ہو جائے، اور جنت کے آٹھ دروازے ہیں۔‘ پھر نبی اللہ صلی اللہ علیہ وسلم ہمارے پاس تشریف لائے تو میں آپ صلی اللہ علیہ وسلم کے سامنے بیٹھ گیا، مگر آپ صلی اللہ علیہ وسلم نے مجھ سے اپنا چہرہ پھیر لیا۔ میں اٹھ کر پھر آپ صلی اللہ علیہ وسلم کے سامنے آ گیا تو آپ صلی اللہ علیہ وسلم نے پھر ایسا ہی کیا، یہاں تک کہ تین مرتبہ ایسا ہوا۔ جب چوتھی مرتبہ ہوا تو میں نے عرض کیا: ’اے اللہ کے نبی! میرے ماں باپ آپ پر قربان، آپ مجھ سے اپنا چہرہ کیوں پھیر لیتے ہیں؟‘ تب آپ صلی اللہ علیہ وسلم میری طرف متوجہ ہوئے اور دو یا تین مرتبہ فرمایا: ’کیا تمہیں ایک زیادہ پسند ہے یا بارہ؟‘ جب میں نے یہ دیکھا تو اپنے ساتھیوں کی طرف لوٹ آیا۔“
امام طبرانی رحمہ اللہ فرماتے ہیں: ”یہ حدیث وضین بن عطاء سے یحییٰ بن حمزہ کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 7947]

سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری امت کی ایک جماعت ہمیشہ اللہ کے حکم پر قائم رہے گی، مخالفت کرنے والا اسے نقصان نہیں پہنچا سکے گا، وہ اپنے دشمنوں سے برسرِ پیکار رہے گی، جب بھی ایک جنگ ختم ہوگی تو دوسری قوم کے ساتھ جنگ چھڑ جائے گی، اللہ تعالیٰ کچھ لوگوں کو سربلند فرمائے گا اور انہیں ان (دشمنوں) کے ذریعے سے رزق عطا فرمائے گا، یہاں تک کہ ان پر قیامت آ جائے۔“ پھر رسول اللہ صلی اللہ علیہ وسلم نے فرمایا: ”وہ اہلِ شام ہیں۔“
امام طبرانی رحمہ اللہ فرماتے ہیں: ”یہ حدیث نصر بن علقمہ سے یحییٰ بن حمزہ کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 7948]

ام المومنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم بلی کے لیے برتن رکھ دیتے تو وہ اس میں سے پانی پی لیتی، پھر آپ صلی اللہ علیہ وسلم اس کے بچے ہوئے پانی سے وضو فرما لیتے۔
امام طبرانی رحمہ اللہ فرماتے ہیں: ”یہ حدیث داود بن صالح سے دراوردی کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 7949]

سیدنا ابوذر رضی اللہ عنہ سے روایت ہے کہ وہ نبی کریم صلی اللہ علیہ وسلم کی خدمت کیا کرتے تھے، پھر جب آپ صلی اللہ علیہ وسلم کی خدمت سے فارغ ہو جاتے تو مسجد میں آ کر وہیں لیٹ جاتے۔
امام طبرانی رحمہ اللہ فرماتے ہیں: ”یہ حدیث سیدنا ابوذر رضی اللہ عنہ سے صرف اسی سند سے مروی ہے، اسے روایت کرنے میں اسماعیل بن عیاش منفرد ہیں۔“ [المعجم الأوسط/بَابُ الْمِيمِ/حدیث: 7950]

یونس بن میسرہ بن حلبس رحمہ اللہ بیان کرتے ہیں: ہم عیادت کے لیے یزید بن اسود رحمہ اللہ کے پاس گئے تو ان کے پاس سیدنا واثلہ بن اسقع رضی اللہ عنہ بھی تشریف لائے۔ جب یزید رحمہ اللہ نے انہیں دیکھا تو ہاتھ بڑھا کر ان کا ہاتھ پکڑا اور اسے اپنے چہرے اور سینے پر پھیرا، کیونکہ اسی ہاتھ سے سیدنا واثلہ رضی اللہ عنہ نے رسول اللہ صلی اللہ علیہ وسلم کی بیعت کی تھی۔ سیدنا واثلہ رضی اللہ عنہ نے ان سے پوچھا: ”اے یزید! اپنے رب کے بارے میں تمہارا گمان کیسا ہے؟“ انہوں نے کہا: ”اچھا ہے۔“ سیدنا واثلہ رضی اللہ عنہ نے فرمایا: ”تو خوش ہو جاؤ، کیونکہ میں نے رسول اللہ صلی اللہ علیہ وسلم کو فرماتے ہوئے سنا: ”اللہ تعالیٰ فرماتا ہے: میں اپنے بندے کے گمان کے مطابق ہوں جو وہ میرے بارے میں رکھتا ہے؛ اگر وہ اچھا گمان رکھے تو اس کے ساتھ اچھا معاملہ ہوگا اور اگر برا گمان رکھے تو برا۔““
امام طبرانی رحمہ اللہ فرماتے ہیں: ”یونس بن میسرہ سے یہ حدیث صرف عمرو بن واقد نے روایت کی ہے۔“ [المعجم الأوسط/بَابُ الْمِيمِ/حدیث: 7951]

سیدنا جابر بن عبداللہ رضی اللہ عنہما سے روایت ہے کہ سیدنا عباس بن عبدالمطلب رضی اللہ عنہ نے عرض کیا: ”اے اللہ کے رسول! کیا میں آپ کو خاص لوگوں والی نبیذ پلاؤں یا عام لوگوں والی نبیذ؟“ آپ صلی اللہ علیہ وسلم نے فرمایا: ”نہیں، بلکہ عام لوگوں والی نبیذ۔“
امام طبرانی رحمہ اللہ فرماتے ہیں: ”زرعہ بن ابراہیم سے یہ حدیث صرف عمرو بن واقد نے روایت کی ہے، اور اسے روایت کرنے میں محمد بن مبارک منفرد ہیں۔“ [المعجم الأوسط/بَابُ الْمِيمِ/حدیث: 7952]

سیدنا معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ اس بندے کو تروتازہ رکھے جس نے میری یہ بات سنی اور اس میں کوئی اضافہ نہ کیا، کیونکہ بہت سے کلمہ پہنچانے والے ایسے شخص تک پہنچاتے ہیں جو اسے ان سے زیادہ محفوظ رکھنے والا ہوتا ہے۔ تین چیزیں ایسی ہیں کہ ان کے بارے میں مومن کا دل خیانت یا کینہ نہیں رکھتا: اللہ کے لیے عمل میں اخلاص، حکمرانوں کی خیر خواہی، اور مسلمانوں کی جماعت کو مضبوطی سے تھامے رکھنا، کیونکہ ان کی دعا انہیں ہر طرف سے گھیرے رکھتی ہے۔“
امام طبرانی رحمہ اللہ فرماتے ہیں: ”یونس بن میسرہ سے یہ حدیث صرف عمرو بن واقد نے روایت کی ہے، اور سیدنا معاذ رضی اللہ عنہ سے یہ صرف اسی سند سے مروی ہے۔“ [المعجم الأوسط/بَابُ الْمِيمِ/حدیث: 7953]

سیدنا ابو الدرداء رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”خبردار! دنیا میں زہد یہ نہیں کہ حلال کو حرام ٹھہرا لیا جائے اور نہ یہ کہ مال کو ضائع کیا جائے، بلکہ دنیا میں زہد یہ ہے کہ جو کچھ تمہارے ہاتھ میں ہے اس پر تمہیں اس سے زیادہ بھروسا نہ ہو جو اللہ کے ہاتھ میں ہے، اور یہ کہ جب تم پر کوئی مصیبت آئے تو اس کے ثواب کی رغبت تمہیں اس سے زیادہ ہو کہ وہ مصیبت نہ آتی اور (مال وغیرہ) تمہارے پاس باقی رہتا۔“
امام طبرانی رحمہ اللہ فرماتے ہیں: ”یونس سے یہ حدیث صرف عمرو بن واقد نے روایت کی ہے، اور سیدنا ابو الدرداء رضی اللہ عنہ سے یہ صرف اسی سند سے مروی ہے۔“ [المعجم الأوسط/بَابُ الْمِيمِ/حدیث: 7954]

سیدنا معاذ بن جبل رضی اللہ عنہ سے روایت ہے کہ نبی اللہ صلی اللہ علیہ وسلم نے فرمایا: ”قیامت کے دن ایک ایسے شخص کو لایا جائے گا جس کی عقل مسخ ہو چکی تھی، ایک اس شخص کو جو فترت (دو رسولوں کے درمیانی زمانے) میں فوت ہوا، اور ایک اس کو جو بچپن میں فوت ہو گیا۔ عقل مسخ شدہ شخص عرض کرے گا: اے میرے رب! اگر تو مجھے عقل عطا فرماتا تو جسے تو نے عقل دی وہ اپنی عقل کے سبب مجھ سے زیادہ خوش بخت نہ ہوتا۔ فترت میں فوت ہونے والا کہے گا: اے میرے رب! اگر تیری طرف سے میرے پاس کوئی عہد (ہدایت) آتا تو جس کے پاس تیری طرف سے عہد آیا وہ اپنے عہد کی وجہ سے مجھ سے زیادہ خوش بخت نہ ہوتا۔ اور بچپن میں فوت ہونے والا کہے گا: اگر تو مجھے عمر دیتا تو جسے تو نے عمر دی وہ اپنی عمر کے سبب مجھ سے زیادہ خوش بخت نہ ہوتا۔ تب رب تبارک و تعالیٰ فرمائے گا: میں تمہیں ایک حکم دیتا ہوں، کیا تم میری اطاعت کرو گے؟ وہ کہیں گے: جی ہاں، تیری عزت کی قسم! اللہ فرمائے گا: جاؤ اور آگ میں داخل ہو جاؤ، اور اگر وہ اس میں داخل ہو جاتے تو وہ انہیں کچھ نقصان نہ پہنچاتی۔“ آپ صلی اللہ علیہ وسلم نے فرمایا: ”پھر ان کے سامنے آگ کے شعلے (یا لپکتے ہوئے انگارے) نمودار ہوں گے، وہ گمان کریں گے کہ یہ تو اللہ کی پیدا کردہ ہر چیز کو ہلاک کر ڈالیں گے، چنانچہ وہ جلدی سے لوٹ آئیں گے۔“ آپ صلی اللہ علیہ وسلم نے فرمایا: ”وہ عرض کریں گے: اے ہمارے رب! تیری عزت کی قسم! ہم اس میں داخل ہونے کے ارادے سے نکلے تھے مگر ہمارے سامنے ایسے شعلے ابھرے کہ ہم نے سمجھا وہ اللہ کی پیدا کی ہوئی ہر چیز کو ہلاک کر دیں گے۔ پھر اللہ انہیں دوسری بار حکم دے گا تو وہ اسی طرح لوٹ آئیں گے اور وہی بات کہیں گے۔ تب اللہ تبارک و تعالیٰ فرمائے گا: تمہارے پیدا کیے جانے سے پہلے ہی میں جانتا تھا کہ تم کیا عمل کرنے والے ہو، میں نے تمہیں اپنے علم کے مطابق پیدا کیا اور تم میرے علم ہی کی طرف لوٹ رہے ہو۔ پھر آگ انہیں اپنی گرفت میں لے لے گی۔“
امام طبرانی رحمہ اللہ فرماتے ہیں: ”اس حدیث کو یونس بن میسرہ سے عمرو بن واقد کے سوا کسی نے روایت نہیں کیا، اور سیدنا معاذ رضی اللہ عنہ سے یہ اسی سند کے ساتھ ہی مروی ہے۔“ [المعجم الأوسط/بَابُ الْمِيمِ/حدیث: 7955]