سیدنا عبداللہ بن عمرو رضی اللہ عنہما بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”میرے بعد بارہ خلیفہ ہوں گے، ان میں ابوبکر صدیق (رضی اللہ عنہ) بھی ہیں، وہ میرے بعد بہت تھوڑا عرصہ ٹھہریں گے۔ اور ایک وہ ہوں گے جو عرب کے مرکزِ اقتدار کی چکی کے مالک (یعنی نظامِ عرب کو چلانے والے) ہوں گے، وہ قابلِ تعریف زندگی گزاریں گے اور شہادت کی موت پائیں گے۔“ ایک شخص نے پوچھا: ”وہ کون ہیں؟“ آپ صلی اللہ علیہ وسلم نے فرمایا: ”عمر بن خطاب (رضی اللہ عنہ)۔“ پھر رسول اللہ صلی اللہ علیہ وسلم سیدنا عثمان بن عفان رضی اللہ عنہ کی طرف متوجہ ہوئے اور فرمایا: ”اے عثمان! اگر اللہ تمہیں (خلافت کی) قمیص پہنائے، پھر لوگ تم سے اسے اتار دینے کا مطالبہ کریں تو اسے نہ اتارنا، اللہ کی قسم! اگر تم نے اسے اتار دیا تو تم جنت نہیں دیکھ سکو گے یہاں تک کہ اونٹ سوئی کے ناکے میں داخل ہو جائے۔“
امام طبرانی رحمہ اللہ فرماتے ہیں: ”یہ حدیث عبداللہ بن عمرو رضی اللہ عنہما سے صرف اسی سند سے مروی ہے، اس میں لیث رحمہ اللہ منفرد ہیں۔“ [المعجم الأوسط/باب الميم/حدیث: 8749]