سیدنا انس بن مالک رضی اللہ عنہ سے روایت ہے کہ ایک شخص لوگوں کی امامت کرایا کرتا تھا اور وہ ہر رکعت میں ﴿قُلْ هُوَ اللهُ أَحَدٌ﴾ اور ایک دوسری سورت بھی پڑھتا تھا۔
اس کے ساتھیوں نے اس سے کہا: ”تم یہ سورت پڑھتے ہو، پھر شاید تم یہ سمجھتے ہو کہ یہ تمہارے لیے کافی نہیں ہے، اسی لیے تم اس کے ساتھ دوسری سورت بھی ملاتے ہو؟ یا تو تم صرف اسی پر اکتفا کرو، یا پھر دوسری سورت پڑھو اور اسے چھوڑ دو۔“
اس نے کہا: ”میں ایسا نہیں کروں گا، اگر تم (میری امامت پر) راضی ہو تو ٹھیک، ورنہ تم جیسا چاہو کرو۔“ وہ شخص ان سب میں سے افضل تھا اور وہ لوگ اس کے علاوہ کسی اور کی امامت کو پسند نہیں کرتے تھے۔
چنانچہ انہوں نے رسول اللہ صلی اللہ علیہ وسلم سے اس بات کا تذکرہ کیا، تو آپ صلی اللہ علیہ وسلم نے دریافت فرمایا: ”تمہیں اپنی قوم کی بات ماننے سے کیا چیز روکتی ہے، اور وہ کیا وجہ ہے کہ تم ہر رکعت میں اس سورت کو لازم پکڑے ہوئے ہو؟“ اس نے عرض کی: ”میں اس سے محبت کرتا ہوں۔“ تو آپ صلی اللہ علیہ وسلم نے فرمایا: ”تیری اس سے محبت نے تجھے جنت میں داخل کر دیا۔“
اس حدیث کو عبید اللہ رحمہ اللہ سے صرف عبد العزیز رحمہ اللہ نے روایت کیا ہے۔ [المعجم الأوسط/باب الألف/حدیث: 898]