سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے (منبر پر چڑھتے ہوئے) فرمایا: ”آمین، آمین، آمین۔“ آپ صلی اللہ علیہ وسلم سے عرض کیا گیا: ”اے اللہ کے رسول! آپ نے پہلے تو ایسا نہیں کیا تھا؟“ تو آپ صلی اللہ علیہ وسلم نے فرمایا: ”جبریل علیہ السلام نے مجھ سے کہا: اس بندے کی ناک خاک آلود ہو، یا فرمایا: وہ دور ہو جائے، جس پر رمضان کا مہینہ آیا اور اس کی مغفرت نہ ہوئی، تو میں نے کہا: آمین۔ پھر انہوں نے کہا: اس بندے کی ناک خاک آلود ہو، یا فرمایا: وہ دور ہو جائے، جس نے اپنے والدین یا ان میں سے کسی ایک کو پایا اور وہ اسے جنت میں داخل نہ کروا سکے، تو میں نے کہا: آمین۔ پھر انہوں نے کہا: اس بندے کی ناک خاک آلود ہو، یا فرمایا: وہ دور ہو جائے، جس کے پاس آپ کا ذکر کیا گیا اور اس نے آپ پر درود نہ بھیجا، تو میں نے کہا: آمین۔“ [المعجم الأوسط/باب الميم/حدیث: 8994]