سیدنا عمرو بن العاص رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھے بلا بھیجا اور حکم دیا کہ میں اپنے کپڑے اور ہتھیار لے کر آؤں۔ میں آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم وضو فرما رہے تھے، آپ صلی اللہ علیہ وسلم نے مجھے نظر اٹھا کر غور سے دیکھا، پھر نظر نیچی کر لی اور فرمایا: ”اے عمرو! میں چاہتا ہوں کہ تمہیں ایک لشکر کا امیر بنا کر بھیجوں تاکہ اللہ تمہیں فتح عطا فرمائے اور تمہیں سلامت رکھے، اور میں تمہیں مال کا ایک اچھا خاصا حصہ بھی دلاؤں گا۔“ میں نے عرض کیا: ”اے اللہ کے رسول! میں نے مال کی خاطر اسلام قبول نہیں کیا، بلکہ میں نے اسلام کی رغبت میں اسلام قبول کیا ہے اور اس لیے کہ میں رسول اللہ صلی اللہ علیہ وسلم کے ساتھ رہوں۔“ تو آپ صلی اللہ علیہ وسلم نے فرمایا: ”ٹھیک ہے، اور نیک آدمی کے لیے پاکیزہ و حلال مال کیا ہی خوب چیز ہے۔“ [المعجم الأوسط/باب الميم/حدیث: 9012]