تابعی امام قتادہ رحمہ اللہ سے اللہ تعالیٰ کے فرمان ﴿وَمَا أَدْرِي مَا يُفْعَلُ بِي وَلَا بِكُمْ﴾ (اور میں نہیں جانتا کہ میرے ساتھ کیا کیا جائے گا اور تمہارے ساتھ کیا کیا جائے گا) کے بارے میں مروی ہے، انہوں نے فرمایا: ”اللہ کے نبی صلی اللہ علیہ وسلم کو اس کے بعد معلوم ہو گیا کہ آپ صلی اللہ علیہ وسلم کے ساتھ کیا کیا جائے گا، جب اللہ تعالیٰ نے یہ آیت نازل فرمائی: ﴿إِنَّا فَتَحْنَا لَكَ فَتْحًا مُبِينًا﴾ ۔“ ہمام رحمہ اللہ کہتے ہیں: پھر انہوں (قتادہ رحمہ اللہ) نے ہمیں سیدنا انس بن مالک رضی اللہ عنہ سے بیان کیا کہ جب نبی صلی اللہ علیہ وسلم پر یہ آیت نازل ہوئی تو آپ صلی اللہ علیہ وسلم نے فرمایا: ”مجھ پر ایک ایسی آیت نازل ہوئی ہے جو مجھے ساری دنیا سے زیادہ محبوب ہے۔“ پھر جب نبی صلی اللہ علیہ وسلم نے اس کی تلاوت فرمائی تو لوگوں میں سے ایک شخص نے عرض کیا: ”اے اللہ کے نبی! آپ کو مبارک ہو، اللہ نے آپ کے لیے واضح فرما دیا کہ آپ کے ساتھ کیا کیا جائے گا، تو ہمارے ساتھ کیا کیا جائے گا؟“ تو اللہ تعالیٰ نے یہ آیت نازل فرمائی: ﴿لِيُدْخِلَ الْمُؤْمِنِينَ وَالْمُؤْمِنَاتِ جَنَّاتٍ تَجْرِي مِنْ تَحْتِهَا الْأَنْهَارُ﴾ (تاکہ وہ مومن مردوں اور مومن عورتوں کو ایسے باغوں میں داخل کرے جن کے نیچے نہریں بہتی ہیں) آخر آیت تک۔
امام طبرانی رحمہ اللہ فرماتے ہیں: ”اس حدیث کو ہمام سے عبداللہ بن محمد بن مغیرہ کے سوا کسی نے روایت نہیں کیا۔“ [المعجم الأوسط/باب الميم/حدیث: 9026]