سیدنا جابر رضی اللہ عنہما سے روایت ہے کہ غزوۂ حنین سے واپسی پر ایک آدمی رسول اللہ صلی اللہ علیہ وسلم کے پاس آیا، اس وقت سیدنا بلال رضی اللہ عنہ کے کپڑے میں چاندی تھی جس میں سے آپ صلی اللہ علیہ وسلم مٹھی بھر کر لوگوں کو دے رہے تھے۔ اس نے کہا: ”اے محمد! انصاف کیجیے۔“ آپ صلی اللہ علیہ وسلم نے فرمایا: ”تیرا برا ہو! اگر میں ہی انصاف نہ کروں تو پھر کون انصاف کرے گا؟ اگر میں انصاف نہ کروں تو میں ناکام و نامراد ہو گیا۔“ تو سیدنا عمر بن خطاب رضی اللہ عنہ نے عرض کیا: ”مجھے اجازت دیجیے کہ میں اس منافق کو قتل کر دوں۔“ آپ صلی اللہ علیہ وسلم نے فرمایا: ”اللہ کی پناہ! کہ لوگ یہ باتیں کریں کہ میں اپنے ساتھیوں کو قتل کرتا ہوں۔ بے شک یہ شخص اور اس کے ساتھی قرآن پڑھیں گے مگر وہ ان کے گلوں سے نیچے نہیں اترے گا، وہ دین سے ایسے نکل جائیں گے جیسے تیر شکار کے پار نکل جاتا ہے۔“ [المعجم الأوسط/باب الميم/حدیث: 9060]