سیدنا مسور بن مخرمہ رضی اللہ عنہ سے روایت ہے کہ سیدنا عبدالرحمن بن عوف رضی اللہ عنہ نے اپنا ایک باغ سیدنا عثمان رضی اللہ عنہ کو چالیس ہزار دینار میں فروخت کیا۔ سیدنا عثمان رضی اللہ عنہ نے سیدنا عبداللہ بن سعد بن ابی سرح رضی اللہ عنہ کو حکم دیا تو انہوں نے اس کی قیمت ادا کر دی۔ سیدنا عبدالرحمن رضی اللہ عنہ نے وہ رقم بنو زہرہ، مسلمان فقراء اور نبی کریم صلی اللہ علیہ وسلم کی ازواجِ مطہرات میں تقسیم کر دی۔ سیدنا مسور رضی اللہ عنہ کہتے ہیں: ”میں ام المومنین سیدہ عائشہ رضی اللہ عنہا کے پاس آیا تو انہوں نے پوچھا: یہ کیا ہے؟ میں نے عرض کیا: اسے سیدنا عبدالرحمن رضی اللہ عنہ نے بھیجا ہے۔“ تو انہوں نے فرمایا: رسول اللہ صلی اللہ علیہ وسلم نے فرمایا تھا: ”میرے بعد تم (ازواجِ مطہرات) پر شفقت صرف صبر کرنے والے لوگ ہی کریں گے۔“ پھر (سیدہ عائشہ رضی اللہ عنہا نے) دعا کی: «سَقَى اللَّهُ ابْنَ عَوْفٍ مِنْ سَلْسَبِيلِ الْجَنَّةِ» ”اللہ تعالیٰ ابن عوف کو جنت کی نہر سلسبیل سے سیراب فرمائے۔“
امام طبرانی رحمہ اللہ فرماتے ہیں: ”اس حدیث کو اسحاق بن جعفر بن محمد سے صرف ابراہیم بن منذر ہی نے روایت کیا ہے۔“ [المعجم الأوسط/باب الميم/حدیث: 9115]