مالک بن اوس بن حدثان رحمہ اللہ سے روایت ہے کہ سیدنا عمر بن خطاب رضی اللہ عنہ نے فرمایا: ”اللہ تعالیٰ نے اس مالِ فَے میں سے رسول اللہ صلی اللہ علیہ وسلم کو ایک ایسا حصہ خاص عطا فرمایا جو آپ صلی اللہ علیہ وسلم کے سوا کسی کو نہیں دیا۔ اللہ تعالیٰ نے فرمایا: ﴿وَمَا أَفَاءَ اللَّهُ عَلَىٰ رَسُولِهِ مِنْهُمْ فَمَا أَوْجَفْتُمْ عَلَيْهِ مِنْ خَيْلٍ وَلَا رِكَابٍ﴾ (آخر آیت تک)۔ چنانچہ یہ مال خالص رسول اللہ صلی اللہ علیہ وسلم کے لیے تھا۔ اللہ کی قسم! آپ صلی اللہ علیہ وسلم نے اسے تمہیں چھوڑ کر اپنے لیے منتخب نہیں کیا اور نہ اسے تم پر ترجیح دے کر اپنے لیے مخصوص کیا، بلکہ آپ صلی اللہ علیہ وسلم نے وہ تمہیں دے دیا، یہاں تک کہ اس میں سے یہی مال باقی بچ گیا جو بچا ہوا ہے۔“ فرمایا: ”رسول اللہ صلی اللہ علیہ وسلم اس مال میں سے اپنے اہل و عیال پر ان کے سال بھر کا خرچ کرتے، پھر جو باقی بچتا اسے لے کر اللہ کے مال کے مصرف میں رکھ دیتے۔ رسول اللہ صلی اللہ علیہ وسلم نے اپنی زندگی بھر اسی طرح عمل کیا، یہاں تک کہ آپ صلی اللہ علیہ وسلم کی وفات ہو گئی۔“ پھر اس کے بعد سیدنا عمر رضی اللہ عنہ نے سیدنا عثمان، سیدنا عبدالرحمن، سیدنا زبیر اور سیدنا سعد رضی اللہ عنہم سے، جو ان کے پاس موجود تھے، فرمایا: ”میں تم دونوں کو اللہ کی قسم دیتا ہوں، کیا تم یہ بات جانتے ہو؟“ ان دونوں نے کہا: ”جی ہاں۔“
امام طبرانی رحمہ اللہ فرماتے ہیں: ”اس حدیث کو زیاد سے زمعہ کے سوا کسی نے روایت نہیں کیا، اور ابو قرہ اسے بیان کرنے میں منفرد ہیں۔“ [المعجم الأوسط/باب الميم/حدیث: 9191]