سیدنا جابر رضی اللہ عنہما سے روایت ہے کہ رسول اللہ صلی اللہ علیہ وسلم نے مسیح دجال کا ذکر کرتے ہوئے فرمایا: ”میں اس کے بارے میں تمہیں ایک ایسی بات بتاتا ہوں جو مجھ سے پہلے کسی نبی نے نہیں فرمائی: وہ کانا ہے، جبکہ اللہ تعالیٰ کانا نہیں ہے، اس کی دونوں آنکھوں کے درمیان «كَافِر» لکھا ہوگا۔“ سیدنا جابر رضی اللہ عنہما نے نبی کریم صلی اللہ علیہ وسلم سے یہ بھی بیان کیا: ”اسے ہر مومن پڑھ لے گا، خواہ لکھنا جانتا ہو یا نہ جانتا ہو۔ وہ چالیس دن تک زمین میں گھومتا پھرے گا اور ہر شہر میں داخل ہوگا سوائے ان دو شہروں کے: مدینہ اور مکہ، کیونکہ اللہ تعالیٰ نے ان دونوں کو اس پر حرام کر دیا ہے۔ اس کے دنوں میں سے ایک دن ایک سال کے برابر ہوگا، ایک دن ایک مہینے کے برابر، اور ایک دن ایک ہفتے کے برابر، پھر اس کے باقی دن تمہارے ان عام دنوں جیسے ہوں گے۔ وہ (زمین میں) صرف چالیس دن ٹھہرے گا۔“ [المعجم الأوسط/باب الميم/حدیث: 9199]