سیدنا عبداللہ بن عباس رضی اللہ عنہما سے روایت ہے، انہوں نے بیان کیا: ”رسول اللہ صلی اللہ علیہ وسلم جب قضائے حاجت کا ارادہ فرماتے تو دور تک چلے جاتے تھے، چنانچہ ایک دن آپ صلی اللہ علیہ وسلم قضائے حاجت کے لیے تشریف لے گئے، پھر وضو کیا اور اپنے دو موزوں میں سے ایک پہن لیا، اتنے میں ایک سبز رنگ کا پرندہ آیا اور اس نے دوسرا موزہ اٹھا لیا، وہ اسے لے کر اوپر بلند ہوا، پھر اسے گرا دیا تو اس میں سے ایک کالا سانپ نکل کر رینگتا ہوا چلا گیا۔ تو رسول اللہ صلی اللہ علیہ وسلم نے فرمایا: ”یہ ایک اعزاز ہے جس سے اللہ نے مجھے نوازا ہے۔“ پھر رسول اللہ صلی اللہ علیہ وسلم نے یہ دعا فرمائی: «اللَّهُمَّ إِنِّي أَعُوذُ بِكَ مِنْ شَرِّ مَنْ يَمْشِي عَلَى بَطْنِهِ، وَمِنْ شَرِّ مَنْ يَمْشِي عَلَى رِجْلَيْنِ، وَمِنْ شَرِّ مَنْ يَمْشِي عَلَى أَرْبَعٍ» ”اے اللہ! میں تیری پناہ مانگتا ہوں اس کے شر سے جو اپنے پیٹ کے بل چلتا ہے، اور اس کے شر سے جو دو پاؤں پر چلتا ہے، اور اس کے شر سے جو چار پاؤں پر چلتا ہے۔“
امام طبرانی رحمہ اللہ فرماتے ہیں: ”اس حدیث کو عکرمہ رحمہ اللہ سے سعد بن طریف کے سوا کسی نے روایت نہیں کیا، اس میں حبان بن علی منفرد ہیں، اور یہ حدیث ابن عباس رضی اللہ عنہما سے صرف اسی سند سے مروی ہے۔“ [المعجم الأوسط/باب الهاء/حدیث: 9304]