سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم ایک چٹائی پر لیٹ گئے تو چٹائی نے آپ صلی اللہ علیہ وسلم کی جلد مبارک پر نشان ڈال دیے۔ جب آپ صلی اللہ علیہ وسلم بیدار ہوئے تو میں آپ صلی اللہ علیہ وسلم کے جسم سے (وہ نشان) پونچھنے لگا اور عرض کیا: ”اے اللہ کے رسول! آپ نے اس چٹائی پر سونے سے پہلے مجھے بتا کیوں نہ دیا کہ میں اس پر کوئی چیز بچھا دیتا جو آپ کو اس سے بچاتی؟“ تو رسول اللہ صلی اللہ علیہ وسلم نے فرمایا: ”مجھے دنیا سے کیا غرض! اور دنیا کو مجھ سے کیا واسطہ! میری اور دنیا کی مثال تو بس اس سوار جیسی ہے جس نے کسی درخت کے سائے میں آرام کیا، پھر اسے چھوڑ کر آگے چل دیا۔“
امام طبرانی رحمہ اللہ فرماتے ہیں: ”اس حدیث کو عمرو بن مرہ رحمہ اللہ سے مسعودی کے سوا کسی نے روایت نہیں کیا۔“ [المعجم الأوسط/باب الهاء/حدیث: 9307]