عطاء بن ابی رباح رحمہ اللہ، صفوان بن امیہ رضی اللہ عنہ کی اولاد سے نقل فرماتے ہیں، انہوں نے کہا: رسول اللہ صلی اللہ علیہ وسلم نے صفوان بن امیہ رضی اللہ عنہ سے اسلحہ عاریتاً لیا، صفوان رضی اللہ عنہ نے کہا: عاریتاً یا زبردستی؟ آپ صلی اللہ علیہ وسلم نے فرمایا: ”عاریتاً۔“ اس نے تیس سے چالیس زرہیں دیں۔ رسول اللہ صلی اللہ علیہ وسلم نے حنین کی جنگ لڑی، جب اللہ نے مشرکوں کو شکست دی تو آپ صلی اللہ علیہ وسلم نے فرمایا: ”صفوان کی زرہوں کو جمع کرو۔“ صحابہ نے چند زرہیں گم پائیں، آپ صلی اللہ علیہ وسلم نے صفوان رضی اللہ عنہ سے کہا: ”اگر تو چاہے تو ہم تاوان دے دیتے ہیں۔“ اس نے کہا: یا رسول اللہ! جو آج میرے دل میں ہے (ایمان) وہ اس دن نہ تھا۔ [السنن الكبرى للبيهقي/كتاب العارية/حدیث: 11479]