اللہ تعالیٰ کا فرمان ہے: ﴿فَإِنْ أَرْضَعْنَ لَكُمْ فَآتُوهُنَّ أُجُورَهُنَّ﴾ ”پھر اگر وہ تمہارے لیے (بچے کو) دودھ پلائیں تو انہیں ان کی اجرت دو۔“ [سورة الطلاق: 6]
چنانچہ اللہ تعالیٰ نے دودھ پلانے پر اجارہ (اجرت کا معاملہ) جائز قرار دیا۔
اور فرمایا: ﴿قَالَتْ إِحْدَاهُمَا يَا أَبَتِ اسْتَأْجِرْهُ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ﴾ ”ان دونوں میں سے ایک نے کہا: ابا جان! اسے اجرت پر رکھ لیجیے، بے شک بہترین شخص جسے آپ اجرت پر رکھیں وہی ہے جو طاقتور اور امانت دار ہو۔“ [سورة القصص: 26] قصے کے آخر تک۔
امام شافعی رحمہ اللہ نے فرمایا: ”تو اللہ تعالیٰ نے ذکر فرمایا کہ اس کے انبیاء میں سے ایک نبی نے چند مقررہ سالوں کے لیے خود کو اجرت پر دیا، جس کے بدلے وہ ایک عورت (سے نکاح) کے مالک ہوئے، تو یہ اجارہ کے جواز پر دلالت کرتا ہے۔“
انہوں نے فرمایا: ”اور کہا گیا ہے کہ انہوں نے ان کو اس (شرط) پر اجرت پر رکھا تھا کہ وہ ان کی (بکریاں) چرائیں گے، اور اللہ بہتر جانتا ہے۔“ [السنن الكبرى للبيهقي/كتاب المساقاة/حدیث: Q11635]

سیدنا عمر بن خطاب رضی اللہ عنہ سے اس قصہ میں منقول ہے کہ ان (عورتوں) کے باپ (شعیب رحمہ اللہ) نے پوچھا: ”تمہیں کیسے علم ہے اس کی قوت اور امانت داری کا؟“ تو اس نے کہا: ”اس کی قوت یہ ہے کہ اس نے اکیلے ہی وہ پتھر اٹھا لیا جسے دس آدمی ہی اٹھا سکتے تھے اور اس کی امانت اس کا یہ کہنا کہ تو میرے پیچھے چل اور راستہ بتا دینا، یہ اس لیے کہ ہوا تیرا جسم میرے لیے عیاں نہ کر دے۔“ [السنن الكبرى للبيهقي/كتاب المساقاة/حدیث: 11635]