عباس بن محمد رحمہ اللہ فرماتے ہیں کہ میں نے یحییٰ بن معین رحمہ اللہ کو اس روایت کے متعلق کہتے ہوئے سنا «لَا نِكَاحَ إِلَّا بِوَلِيٍّ» ”ولی کے بغیر کوئی نکاح نہیں“ جس کو ابن جریج رحمہ اللہ نے روایت کیا ہے۔ میں نے ان سے کہا کہ ابن علیہ رحمہ اللہ کہتے ہیں کہ ابن جریج رحمہ اللہ نے کہا: میں نے امام زہری رحمہ اللہ سے اس کے بارے میں سوال کیا تو انہوں نے کہا: مجھے یاد نہیں۔ یحییٰ بن معین رحمہ اللہ نے کہا: یہ بات صرف ابن علیہ رحمہ اللہ بیان کرتے ہیں۔ ابن علیہ رحمہ اللہ نے ابن جریج رحمہ اللہ کی کتابیں عبدالمجید بن عبدالعزیز بن ابی رواد پر پیش کیں تو انہوں نے ان کی اصلاح کی۔ میں نے یحییٰ بن معین رحمہ اللہ سے کہا کہ میرا گمان نہیں تھا کہ عبدالمجید رحمہ اللہ ایسے ہیں، تو انہوں نے کہا: وہ عبدالمجید رحمہ اللہ ابن جریج رحمہ اللہ کی روایت کو سب سے زیادہ جاننے والے تھے لیکن انہوں نے اپنے آپ کو حدیث (کی روایت) کے لیے وقف نہیں کیا۔ [السنن الكبرى للبيهقي/كتاب النكاح/حدیث: 13604]