سیدہ عائشہ رضی اللہ عنہا سے روایت ہے کہ میں بیٹھی ہوئی اون کات رہی تھی اور نبی صلی اللہ علیہ وسلم اپنے جوتے کو پیوند لگا رہے تھے، آپ کی پیشانی سے پسینہ بہنے لگا اور آپ کے پسینے سے روشنی پھوٹ رہی تھی، میں حیرانی سے خاموش ہوگئی۔ رسول اللہ صلی اللہ علیہ وسلم نے میری طرف دیکھا اور فرمایا: ”اے عائشہ! کس چیز نے تجھے حیران کیا ہے؟“ میں نے کہا: آپ کی پیشانی سے نکلنے والے پسینے اور اس پسینے سے نکلنے والی روشنی نے، اور اگر آپ کو ابو کبیر ذہلی دیکھ لیتا تو وہ جان جاتا کہ آپ اس کے شعر کے زیادہ حق دار ہیں۔ رسول اللہ صلی اللہ علیہ وسلم نے فرمایا: ”ابو کبیر نے کیا کہا ہے؟“ عائشہ رضی اللہ عنہا فرماتی ہیں: وہ کہتا ہے:
”اور وہ حیض کی ہر آلودگی سے پاک ہے، دودھ پلانے والی کی خرابی اور درد سر والی کی بیماری سے محفوظ ہے۔ جب تو اس کے چہرے کی رونق کو دیکھے تو وہ ایسے چمک رہا ہوگا جیسے گرجنے چمکنے والے بادل۔“
عائشہ رضی اللہ عنہا فرماتی ہیں: نبی صلی اللہ علیہ وسلم میری طرف کھڑے ہوئے اور میری دونوں آنکھوں کے درمیان بوسہ دیا اور فرمایا: ”اے عائشہ! اللہ تجھے میری طرف سے بہترین بدلہ دے۔“ [السنن الكبرى للبيهقي/كتاب العدد/حدیث: 15427]