ابو درداء رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو فرماتے سنا کہ ”اللہ ہر گناہ معاف کر دیں گے لیکن مشرک اور کسی مومن کو ناحق قتل کرنے والے کو معاف نہیں کریں گے۔“
صدقہ کہتے ہیں کہ خالد نے فرمایا: ہانی بن کلثوم بن کناز کہتے ہیں کہ میں نے محمود بن ربیع عن عبادہ رضی اللہ عنہ کو مرفوعاً فرماتے ہوئے سنا کہ ”جو کسی مومن کو قتل کرے، پھر اس کے قتل پر خوش بھی ہو تو اس کی نہ فرضی اور نفلی کوئی عبادت قبول نہیں ہوتی۔“ ایسے ہی عبادہ رضی اللہ عنہ کی ایک روایت میں یہ الفاظ بھی ہیں کہ ”ہمیشہ مومن صالح رہتا ہے جب تک کہ وہ ناحق خون نہ کرے۔“ خالد کہتے ہیں: میں نے یحییٰ غسانی سے پوچھا کہ قتل پر خوش ہونے سے کیا مراد ہے؟ تو انہوں نے فرمایا: جو فتنے میں قتل کرے اور قتل کر کے یہ سمجھے میں حق پر تھا، اللہ اسے کبھی معاف نہیں فرمائے گا۔ [السنن الكبرى للبيهقي/كتاب الجنايات/حدیث: 15861]