یہ بات امام زہری رحمہ اللہ نے کہی ہے، اور انہوں نے فرمایا: ”اگر (اسے قبلہ رخ کرنا) معلوم نہ ہو تو اس (ذبیحہ) کو کھانے میں کوئی حرج نہیں جبکہ اس نے اس پر اللہ کا نام لیا ہو۔“
اور ہمیں سیدنا جابر بن عبداللہ رضی اللہ عنہ کی حدیث میں روایت پہنچی ہے کہ انہوں نے فرمایا: ”نبی کریم صلی اللہ علیہ وسلم نے عید کے دن دو سینگوں والے، سفید و سیاہ رنگ کے مینڈھے ذبح کیے، جب آپ صلی اللہ علیہ وسلم نے ان کا رخ (قبلہ کی طرف) کیا تو فرمایا: ﴿وَجَّهْتُ وَجْهِيَ لِلَّذِي فَطَرَ السَّمَوَاتِ وَالْأَرْضَ حَنِيفًا﴾ ’میں نے یکسو ہو کر اپنا رخ اس ذات کی طرف کر لیا جس نے آسمانوں اور زمین کو پیدا کیا۔‘ [سورة الأنعام: 79] “ پھر انہوں نے (پوری) حدیث ذکر کی، اور یہ (روایت اپنے مقام پر) آئے گی۔
اور ایک دوسری روایت میں ہے کہ: ”جب آپ صلی اللہ علیہ وسلم نے ذبح کیا تو ان دونوں کا رخ قبلہ کی طرف کیا۔“ [السنن الكبرى للبيهقي/كتاب الضحايا/حدیث: Q19173]

نافع، سیدنا عبداللہ بن عمر رضی اللہ عنہما سے نقل فرماتے ہیں کہ جانور کو ذبح کرتے وقت قبلہ رخ کر لینا مستحب ہے۔
اس بارے میں سیدہ عائشہ رضی اللہ عنہا سے ایک مرفوع حدیث بھی مروی ہے، اور اس کی سند ضعیف ہے۔ [السنن الكبرى للبيهقي/كتاب الضحايا/حدیث: 19173]