اللہ تبارک و تعالیٰ کا فرمان ہے: ﴿وَقَدْ فَصَّلَ لَكُمْ مَا حَرَّمَ عَلَيْكُمْ إِلَّا مَا اضْطُرِرْتُمْ إِلَيْهِ﴾ ”حالانکہ اس نے تمہارے لیے وہ چیزیں تفصیل سے بیان کر دی ہیں جو اس نے تم پر حرام کی ہیں، سوائے اس کے جس کی طرف تم مجبور کر دیے جاؤ۔“ [سورة الأنعام: 119]
اور فرمایا: ﴿إِنَّمَا حَرَّمَ عَلَيْكُمُ الْمَيْتَةَ وَالدَّمَ وَلَحْمَ الْخِنْزِيرِ وَمَا أُهِلَّ بِهِ لِغَيْرِ اللهِ فَمَنِ اضْطُرَّ غَيْرَ بَاغٍ وَلَا عَادٍ فَلَا إِثْمَ عَلَيْهِ﴾ ”اس نے تم پر صرف مردار، خون، خنزیر کا گوشت اور وہ چیز حرام کی ہے جس پر اللہ کے سوا کسی اور کا نام پکارا گیا ہو، پھر جو شخص مجبور ہو جائے، نہ سرکشی کرنے والا ہو اور نہ حد سے بڑھنے والا، تو اس پر کوئی گناہ نہیں۔“ [سورة البقرة: 173]
مجاہد رحمہ اللہ نے ﴿غَيْرَ بَاغٍ وَلَا عَادٍ﴾ ”نہ سرکشی کرنے والا ہو اور نہ حد سے بڑھنے والا۔“ [سورة البقرة: 173] کے بارے میں فرمایا: ”یعنی نہ ڈاکہ ڈالنے والا ہو، نہ مسلمانوں کے حکمرانوں سے الگ ہونے (اور بغاوت کرنے) والا ہو، اور نہ اللہ جل جلالہ کی نافرمانی (کے سفر) میں نکلنے والا ہو۔“... [السنن الكبرى للبيهقي/كتاب الضحايا/حدیث: Q19634]

سیدنا جابر بن سمرہ رضی اللہ عنہ فرماتے ہیں کہ کسی شخص کا خچر یا اونٹنی مر گئی، وہ نبی صلی اللہ علیہ وسلم سے فتویٰ پوچھنے آیا تو جابر کہتے ہیں کہ رسول اللہ صلی اللہ علیہ وسلم نے فرمایا: ”کیا تجھے کوئی چیز اس سے بے پروا کرنے والی ہے؟“ اس نے جواب دیا: کوئی چیز موجود نہیں۔ تب آپ صلی اللہ علیہ وسلم نے فرمایا: ”جاؤ جا کر کھا لو۔“ [السنن الكبرى للبيهقي/كتاب الضحايا/حدیث: 19634]