سیدنا علبہ بن زید رضی اللہ عنہ بیان کرتے ہیں: نبی اکرم صلی اللہ علیہ وسلم نے صدقہ کرنے کی ترغیب دی تو سیدنا علبہ رضی اللہ عنہ کھڑے ہوئے انہوں نے عرض کی: یا رسول اللہ! آپ نے صدقہ دینے کی ترغیب دی ہے میرے پاس صرف میری عزت ہے میں اُسے اس شخص کے لئے صدقہ قرار دیتا ہوں جو میرے ساتھ زیادتی کرتا ہے (یعنی مجھے برا بھلا کہتا ہے، یا میری عزت اچھالتا ہے) راوی کہتے ہیں: نبی اکرم صلی اللہ علیہ وسلم نے ان سے منہ موڑ لیا جب اگلا دن آیا تو نبی اکرم صلی اللہ علیہ وسلم نے دریافت کیا: علبہ بن زید کہاں ہے؟ (راوی کو شک ہے شاید یہ الفاظ ہیں:) اپنی عزت کو صدقہ کرنے والا شخص کہاں ہے؟ اللہ تعالیٰ نے اس کی طرف سے اس کو قبول کر لیا ہے۔۔۔۔۔۔۔۔۔۔ یا اس کی مانند کوئی کلمات آپ نے ارشاد فرمائے۔
یہ روایت امام بزار نے نقل کی ہے۔ اس کی سند میں ایک راوی محمد بن سلیمان بن مسمول ہے، اور وہ ضعیف ہے۔ [مجمع الزاوئد ومنبع الفوائد/كتاب الزكاة/حدیث: 4633]