سیدنا عمر بن خطاب رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اسلام غالب آ جائے گا، یہاں تک کہ تاجر لوگ سمندروں میں سفر کریں گے اور گھوڑے اللہ کے راہ میں جائیں گے، پھر ایک قوم ظاہر ہو گی، جو قرآن پڑھیں گے اور یہ کہیں گے: ہم سے زیادہ قرآن کس کو آتا ہے؟ ہم سے زیادہ علم کس کے پاس ہے؟ ہم سے زیادہ (دین کی) سمجھ بوجھ کس کے پاس ہے؟ پھر نبی اکرم صلی اللہ علیہ وسلم نے اپنے اصحاب سے دریافت کیا: کیا اُن لوگوں میں کوئی بھلائی ہو گی؟ لوگوں نے عرض کی: اللہ اور اس کا رسول بہتر جانتے ہیں، نبی اکرم صلی اللہ علیہ وسلم نے ارشاد فرمایا: ”وہ لوگ تم میں سے (یعنی اس اُمت میں سے) ہوں گے اور وہ لوگ جہنم کا ایندھن ہوں گے۔“
یہ روایت امام طبرانی نے معجم اوسط میں، اور امام بزار نے نقل کی ہے، امام بزار کے رجال کی توثیق کی گئی ہے۔ [مجمع الزاوئد ومنبع الفوائد/كتاب العلم/حدیث: 877]