سیدنا ابو برزہ اسلمی رضی اللہ عنہ سے روایت ہے کہ سیدنا جلیبیب رضی اللہ عنہ ایک انصاری مرد تھے، وہ اکثر خواتین کی مجالس میں جایا کرتے اور ان سے گفتگو کیا کرتے تھے، تو سیدنا ابو برزہ رضی اللہ عنہ نے اپنی اہلیہ سے فرمایا: ”تم لوگ اللہ سے ڈرو، جلیبیب تمہارے پاس ہرگز داخل نہ ہوا کرے“۔ نبی کریم صلی اللہ علیہ وسلم کے صحابہ کرام رضی اللہ عنہم کا یہ طریقہ کار تھا کہ جب ان میں سے کسی کی کوئی بیوہ یا بن بیاہی لڑکی ہوتی تو وہ اس کا نکاح اس وقت تک نہیں کرتے تھے جب تک انہیں یہ پتا نہ چل جاتا کہ رسول اللہ صلی اللہ علیہ وسلم کو اس کے بارے میں کوئی حاجت ہے یا نہیں۔ ایک دن رسول اللہ صلی اللہ علیہ وسلم نے ایک انصاری شخص سے فرمایا: ”اے فلاں! اپنی بیٹی کا نکاح مجھ سے کر دو“۔ اس نے عرض کیا: ”بہت خوب، یہ تو میرے لیے بڑی سعادت اور آنکھوں کی ٹھنڈک ہے“۔ آپ صلی اللہ علیہ وسلم نے فرمایا: ”میں اسے اپنی ذات کے لیے طلب نہیں کر رہا“۔ اس نے پوچھا: ”پھر کس کے لیے؟“ آپ صلی اللہ علیہ وسلم نے فرمایا: ”جلیبیب کے لیے“۔ اس نے عرض کیا: ”اے اللہ کے رسول صلی اللہ علیہ وسلم ! میں اس کی ماں سے مشورہ کر لوں“۔ چنانچہ وہ (اپنی اہلیہ کے پاس) آیا اور کہا کہ رسول اللہ صلی اللہ علیہ وسلم تمہاری بیٹی کے لیے رشتہ مانگ رہے ہیں۔ اس نے کہا: ”بہت مبارک، یہ تو بڑی خوش قسمتی ہے کہ رسول اللہ صلی اللہ علیہ وسلم سے رشتہ ہو!“۔ اس نے بتایا: ”وہ اپنے لیے نہیں مانگ رہے“۔ اس نے پوچھا: ”پھر کس کے لیے؟“ اس نے کہا: ”جلیبیب کے لیے“۔ وہ پکار اٹھی: ”ہائے افسوس! کیا جلیبیب کے لیے؟ نہیں، اللہ کی قسم! میں جلیبیب کو قبول نہیں کروں گی“۔ جب اس کا باپ نبی کریم صلی اللہ علیہ وسلم کے پاس (معذرت کے لیے) جانے کے لیے اٹھا تو اس لڑکی نے اپنے حجرے سے والدین سے دریافت کیا: ”میرا رشتہ کس نے مانگا ہے؟“ انہوں نے بتایا کہ رسول اللہ صلی اللہ علیہ وسلم نے۔ اس نے کہا: ”کیا تم رسول اللہ صلی اللہ علیہ وسلم کے حکم کو رد کر رہے ہو؟ مجھے رسول اللہ صلی اللہ علیہ وسلم کے سپرد کر دو، وہ مجھے ہرگز ضائع نہیں کریں گے“۔ پس اس کا باپ نبی کریم صلی اللہ علیہ وسلم کی بارگاہ میں حاضر ہوا اور عرض کیا: ”آپ جیسا مناسب سمجھیں“، چنانچہ آپ صلی اللہ علیہ وسلم نے اس کا نکاح سیدنا جلیبیب رضی اللہ عنہ سے کر دیا۔ حماد کہتے ہیں کہ مجھ سے اسحاق بن عبداللہ بن ابی طلحہ نے کہا کہ میں نے ثابت سے پوچھا: ”کیا آپ جانتے ہیں کہ نبی کریم صلی اللہ علیہ وسلم نے اس لڑکی کے لیے کیا دعا فرمائی تھی؟“ انہوں نے بتایا کہ آپ صلی اللہ علیہ وسلم نے یوں دعا فرمائی: «اللَّهُمَّ صُبَّ عَلَيْهِمَا الْخَيْرَ صَبًّا، وَلَا تَجْعَلْ عَيْشَهُمَا كَدًّا كَدًّا!» ”اے اللہ! ان دونوں پر خیر و بھلائی کے خوب دھارے بہا دے اور ان کی معیشت کو تنگی و مشقت والی نہ بنانا“۔ ثابت کہتے ہیں کہ آپ صلی اللہ علیہ وسلم نے ان کا نکاح کر دیا۔
میں (ابن حجر) کہتا ہوں کہ اسے معمر نے ثابت کے واسطے سے سیدنا انس رضی اللہ عنہ سے روایت کیا ہے، اور دیلم بن غزوان نے بھی ثابت عن انس کی سند سے اس کی پیروی کی ہے، لیکن حماد بن سلمہ کی (سیدنا ابو برزہ رضی اللہ عنہ سے مروی) یہ روایت زیادہ صحیح ہے۔ [المطالب العالية بزوائد المسانيد الثمانية/كتاب النكاح/حدیث: 1585]