سیدنا قعقاع بن ابی حدرد اسلمی رضی اللہ عنہ سے روایت ہے کہ رسول اللہ صلی اللہ علیہ وسلم قبیلہ اسلم کے کچھ لوگوں کے پاس سے گزرے جو تیر اندازی کا مقابلہ کر رہے تھے، تو آپ صلی اللہ علیہ وسلم نے فرمایا: ”اے بنو اسماعیل! تیر اندازی کرو کیونکہ تمہارے جدِ امجد بھی تیر انداز تھے، اور میں ابن اکوع کے ساتھ ہوں۔“ تب ان لوگوں نے اپنے ہاتھ روک لیے تو رسول اللہ صلی اللہ علیہ وسلم نے دریافت فرمایا: ”تمہیں کیا ہوا، تم تیر اندازی کیوں نہیں کر رہے؟“ انہوں نے عرض کی: اے اللہ کے رسول صلی اللہ علیہ وسلم ! ہم کیسے مقابلہ کریں جبکہ آپ صلی اللہ علیہ وسلم نے فرما دیا ہے کہ ”میں ابن اکوع کے ساتھ ہوں“ اور ہم جانتے ہیں کہ آپ صلی اللہ علیہ وسلم جس گروہ کے ساتھ ہوں وہ کبھی مغلوب نہیں ہو سکتا، تو آپ صلی اللہ علیہ وسلم نے ارشاد فرمایا: ”تم تیر اندازی جاری رکھو، میں تم سب کے ساتھ ہوں۔“ [المطالب العالية بزوائد المسانيد الثمانية/كتاب الجهاد/حدیث: 2003]