سیدنا عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: ”رہی میری بات، تو میں ٹیک لگا کر (یعنی کسی چیز کا سہارا لے کر) کھانا نہیں کھاتا ہوں۔“
اس حدیث کو امام حمیدی نے اپنی مسند میں روایت کیا ہے، اس کی سند میں اگرچہ علی بن زید بن جدعان موجود ہیں جو کہ ضعیف ہیں، تاہم اس حدیث کا متن دیگر صحیح اسانید سے ثابت ہے، جیسا کہ صحیح بخاری میں سیدنا ابوجحیفہ رضی اللہ عنہ سے مروی ہے کہ آپ صلی اللہ علیہ وسلم نے تواضع اور بندگی کی حالت میں رہنے کے لیے ٹیک لگا کر کھانے سے اجتناب فرمایا۔ [المطالب العالية بزوائد المسانيد الثمانية/كتاب الأطعمة والأشربة/حدیث: 2397]