سیدنا عبداللہ بن عباس رضی اللہ عنہما کے مولیٰ کریب رحمہ اللہ سے روایت ہے کہ سیدنا ابن عباس رضی اللہ عنہما نے ایک ذمی (اسلامی ریاست کے غیر مسلم شہری) کو خط لکھا تو اس کی ابتدا سلام سے کی، میں نے (تعجب کا اظہار کرتے ہوئے) ان سے عرض کی کہ کیا آپ (ایک غیر مسلم کے لیے) سلام سے آغاز فرما رہے ہیں؟ تو انہوں نے جواباً ارشاد فرمایا: ”بے شک اللہ تعالیٰ ہی السلام (سلامتی کا منبع اور سلامتی دینے والا) ہے“۔
اس اثر کو امام مسدد نے اپنی مسند میں روایت کیا ہے، اس کی سند میں شریک بن عبداللہ قاضی موجود ہیں جو کہ صدوق ہیں لیکن ان کے حافظے میں خرابی کی بنا پر یہ سند حسن درجے کی ہے۔ [المطالب العالية بزوائد المسانيد الثمانية/كتاب الأدب/حدیث: 2651]