سیدہ کبشہ بنت کعب رضی اللہ عنہا سے روایت ہے، وہ بیان کرتی ہیں کہ میں عشاء کی نماز (عتمہ) سے پہلے سو جایا کرتی تھی، پھر جب میں اقامت کی آواز سنتی تو بیدار ہو کر نماز ادا کر لیتی تھی، پھر مجھے یہ اطلاع ملی کہ عشاء سے قبل سونا ناپسندیدہ عمل ہے، چنانچہ میں نے اس متعلق سیدنا انس بن مالک رضی اللہ عنہ سے دریافت کیا تو انہوں نے بھی اسے ناپسند فرمایا اور تاکیداً حکم دیا کہ: ”تم عشاء کی نماز سے پہلے ہرگز نہ سویا کرو۔“
یہ روایت امام مسدد بن مسرہد رحمہ اللہ نے اپنی مسند میں ذکر کی ہے، اور عشاء کی نماز سے قبل سونے اور اس کے بعد بلا ضرورت گفتگو کرنے کی کراہت دیگر صحیح احادیث سے بھی ثابت ہے تاکہ عشاء کی نماز فوت نہ ہو یا جماعت میں خلل واقع نہ ہو۔ [المطالب العالية بزوائد المسانيد الثمانية/كتاب الصلاة/حدیث: 284]