سیدنا عبداللہ بن عمر رضی اللہ عنہما سے روایت ہے کہ میں رسول اللہ صلی اللہ علیہ وسلم کے ہمراہ نکلا یہاں تک کہ ہم انصار کے ایک باغ میں داخل ہوئے، پس ہم وہاں سے کھجوریں چننے اور کھانے لگے، تو آپ صلی اللہ علیہ وسلم نے مجھ سے دریافت فرمایا: "اے ابن عمر! تمہیں کیا ہوا کہ تم نہیں کھا رہے؟" میں نے عرض کیا: اے اللہ کے رسول! مجھے ان کی رغبت نہیں ہو رہی، تو آپ صلی اللہ علیہ وسلم نے ارشاد فرمایا: "لیکن مجھے ان کی اشتہا ہو رہی ہے اور یہ چوتھی صبح ہے کہ میں نے کھانے کا ایک لقمہ تک نہیں چکھا اور نہ ہی مجھے کچھ میسر آیا ہے، اگر میں چاہتا تو اپنے رب سے دعا کرتا اور وہ مجھے کسریٰ و قیصر کی بادشاہت جیسا مال و متاع عطا فرما دیتا، اے ابن عمر! تمہارا اس وقت کیا حال ہوگا جب تم ایسے لوگوں میں رہ جاؤ گے جو ایک ایک سال کا رزق جمع کر کے چھپائیں گے اور ان کا اللہ پر یقین و توکل کمزور ہو جائے گا؟" ابن عمر رضی اللہ عنہما فرماتے ہیں: اللہ کی قسم! ابھی ہم اپنی جگہ سے ہٹے نہیں تھے اور نہ ہی کہیں گئے تھے کہ یہ آیت نازل ہوئی: ﴿وَكَأَيِّنْ مِنْ دَابَّةٍ لَا تَحْمِلُ رِزْقَهَا اللَّهُ يَرْزُقُهَا وَإِيَّاكُمْ وَهُوَ السَّمِيعُ الْعَلِيمُ﴾ [سورة العنكبوت: 60] ، پھر رسول اللہ صلی اللہ علیہ وسلم نے ارشاد فرمایا: "بے شک اللہ عزوجل نے مجھے دنیا کا مال جمع کرنے اور خواہشات کی پیروی کا حکم نہیں دیا، پس جو شخص دنیا کا مال اس نیت سے جمع کرتا ہے کہ اسے ہمیشہ کی زندگی مل جائے گی تو وہ جان لے کہ زندگی تو اللہ عزوجل ہی کے ہاتھ میں ہے، خبردار! میں نہ تو کوئی دینار جمع کرتا ہوں اور نہ ہی درہم، اور نہ ہی کل کے لیے کوئی رزق چھپا کر رکھتا ہوں۔"
اس حدیث کی سند میں ابو العطوف جراح بن منہال متروک الحدیث اور ضعیف راوی ہے، اس روایت کی تخریج امام بیہقی نے شعب الایمان میں کی ہے۔ [المطالب العالية بزوائد المسانيد الثمانية/كتاب الرقائق/حدیث: 3158]