علی بن ربیعہ رحمہ اللہ سے روایت ہے کہ سیدنا علی رضی اللہ عنہ نے مجھے اپنی سواری پر اپنے پیچھے بٹھایا، پھر وہ مجھے لے کر ایک قبرستان کی جانب چلے، پھر انہوں نے اپنا سرِ مبارک آسمان کی طرف اٹھایا اور یہ دعا پڑھی: «اللَّهُمَّ اغْفِرْ لِي ذُنُوبِي إِنَّهُ لَا يَغْفِرُ الذُّنُوبَ أَحَدٌ غَيْرُكَ» ”اے اللہ! میرے گناہوں کو بخش دے، یقیناً تیرے سوا کوئی بھی گناہوں کو معاف کرنے والا نہیں ہے“۔ پھر وہ میری طرف متوجہ ہوئے اور مسکرانے لگے، تو میں نے عرض کیا: اے امیر المؤمنین! آپ اپنے رب سے مغفرت طلب کر رہے ہیں اور پھر میری طرف دیکھ کر مسکرا رہے ہیں؟ انہوں نے فرمایا: (دراصل) رسول اللہ صلی اللہ علیہ وسلم نے مجھے اپنی سواری پر اپنے پیچھے بٹھایا تھا، پھر آپ صلی اللہ علیہ وسلم مجھے لے کر حرہ (مدینہ کے پتھریلے علاقے) کی ایک جانب تشریف لے گئے، پھر آپ صلی اللہ علیہ وسلم نے اپنا سرِ انور آسمان کی طرف اٹھایا اور دعا فرمائی: ” «اللَّهُمَّ اغْفِرْ لِي ذُنُوبِي إِنَّهُ لَا يَغْفِرُ الذُّنُوبَ أَحَدٌ غَيْرُكَ» “ ”اے اللہ! میرے گناہ بخش دے، کیوں کہ تیرے سوا کوئی بھی گناہوں کو معاف کرنے والا نہیں ہے“۔ پھر آپ صلی اللہ علیہ وسلم میری طرف متوجہ ہوئے اور مسکرائے، تو میں نے عرض کیا: اے اللہ کے رسول! آپ اپنے رب سے بخشش کی دعا بھی کر رہے ہیں اور میری طرف دیکھ کر مسکرا بھی رہے ہیں؟ تو آپ صلی اللہ علیہ وسلم نے ارشاد فرمایا: ”میں اپنے رب عزوجل کے تبسم (خوشی) فرمانے کی وجہ سے مسکرایا ہوں، کیوں کہ اللہ تعالیٰ اپنے بندے کی اس بات پر (نہایت خوش ہوتے ہوئے) تعجب فرماتا ہے کہ اسے اس بات کا علم اور مکمل یقین ہے کہ میرے سوا اس کے گناہوں کو معاف کرنے والا کوئی نہیں ہے“۔
یہ حدیث صحیح ہے اور اس کے راوی ثقہ ہیں، نیز اسے امام ابوداؤد اور امام ترمذی نے بھی روایت کیا ہے۔ [المطالب العالية بزوائد المسانيد الثمانية/كتاب الرقائق/حدیث: 3259]