عامر بن سعد بن ابی وقاص رحمہ اللہ بیان کرتے ہیں کہ میری ملاقات سیدنا ابو ایوب انصاری رضی اللہ عنہ سے ہوئی تو انہوں نے (ترغیب دیتے ہوئے) مجھ سے فرمایا: ”کیا میں تمہیں اس کام کا حکم نہ دوں جس کی وصیت و تاکید مجھے رسول اللہ صلی اللہ علیہ وسلم نے فرمائی تھی؟ وہ یہ کہ میں کثرت کے ساتھ «لَا حَوْلَ وَلَا قُوَّةَ إِلَّا بِاللهِ» پڑھا کروں، کیونکہ بے شک یہ کلمات جنت کے خزانوں میں سے ایک خزانہ ہیں۔“ اس دعا کا مفہوم یہ ہے کہ ”گناہوں سے بچنے کی ہمت اور نیکی کرنے کی قوت اللہ ہی کی توفیق و مدد سے ممکن ہے۔“
اس کی سند حسن ہے۔ [المطالب العالية بزوائد المسانيد الثمانية/كتاب الأذكار والدعوات/حدیث: 3425]