سیدنا جابر رضی اللہ عنہما سے روایت ہے کہ ایک مرتبہ ہم رسول اللہ صلی اللہ علیہ وسلم کے ہمراہ بازار میں موجود تھے کہ اچانک ایک خاتون سامنے آئی جس نے آپ صلی اللہ علیہ وسلم کی سواری کی لگام تھام لی، جبکہ آپ صلی اللہ علیہ وسلم ایک گدھے پر سوار تھے۔ اس عورت نے عرض کیا: ”اے اللہ کے رسول! میرا شوہر میرے قریب نہیں آتا؛ لہٰذا آپ میرے اور اس کے درمیان جدائی (علیحدگی) کروا دیں۔“ آپ صلی اللہ علیہ وسلم نے دریافت فرمایا: ”اس کا شوہر کون ہے؟“ پھر نبی کریم صلی اللہ علیہ وسلم نے اس کے شوہر کو بلوایا اور اس سے دریافت فرمایا: ”تمہارا اس کے ساتھ کیا معاملہ ہے؟ یہ تمہاری جانب سے بے رخی اور بے توجہی کی شکایت لے کر آئی ہے کہ تم اس کے قریب نہیں جاتے؟“ اس شخص نے عرض کیا: ”اے اللہ کے رسول! اس ذات کی قسم جس نے آپ کو عزت و تکریم عطا فرمائی ہے! میرا تو ابھی اسی گزشتہ رات اس سے تعلق (ملاپ) قائم ہوا ہے۔“ یہ سن کر وہ عورت رونے لگی اور کہنے لگی: ”اس نے جھوٹ بولا ہے، آپ میرے اور اس کے درمیان علیحدگی فرما دیں کیونکہ یہ اللہ کی مخلوق میں مجھے سب سے زیادہ ناپسند ہے۔“ تب رسول اللہ صلی اللہ علیہ وسلم (اس صورتحال پر) تبسم فرمانے لگے، پھر آپ صلی اللہ علیہ وسلم نے ان دونوں کے سروں کو (قریب کر کے) تھاما اور ان کو ایک دوسرے کے قریب کیا اور یہ دعا فرمائی: «اللَّهُمَّ ادْنُ كُلَّ وَاحِدٍ مِنْهُمَا إِلَى صَاحِبِهِ» ”اے اللہ! ان میں سے ہر ایک کو اس کے ساتھی کے قریب (اور باہم مانوس) فرما دے۔“ سیدنا جابر رضی اللہ عنہ بیان کرتے ہیں کہ پھر جتنا عرصہ اللہ نے چاہا ہم ٹھہرے رہے، ایک مدت بعد جب رسول اللہ صلی اللہ علیہ وسلم کا دوبارہ بازار سے گزر ہوا تو وہی خاتون چمڑے کا سامان اٹھائے جا رہی تھی۔ جب اس نے آپ صلی اللہ علیہ وسلم کو دیکھا تو فوراً چمڑا نیچے ڈال دیا اور نبی کریم صلی اللہ علیہ وسلم کی خدمت میں دوڑتی ہوئی حاضر ہوئی اور عرض کرنے لگی: ”اے اللہ کے رسول! اس ذات کی قسم جس نے آپ کو حق کے ساتھ مبعوث فرمایا ہے! اب اللہ کی پیدا کردہ مخلوقات میں آپ صلی اللہ علیہ وسلم کے علاوہ مجھے اپنے شوہر سے بڑھ کر کوئی اور محبوب نہیں ہے۔“
تخریج: مسند احمد: 14502، مسند ابویعلی: 2061؛ اس کی سند میں یوسف بن محمد بن منکدر ضعیف راوی ہے، تاہم دیگر شواہد کی بنا پر اس قصے کی اصل ثابت ہے۔ [المطالب العالية بزوائد المسانيد الثمانية/كتاب المناقب/حدیث: 3811]