سیدنا عبداللہ بن عمر رضی اللہ عنہما سے روایت ہے کہ جب سیدنا عمر بن خطاب رضی اللہ عنہ (پر قاتلانہ حملہ ہوا اور انہیں) زخمی کر دیا گیا اور انہوں نے (خلافت کے فیصلے کے لیے) مجلسِ شوریٰ بنانے کا حکم دیا، تو ام المومنین سیدہ حفصہ رضی اللہ عنہا ان کے پاس تشریف لائیں اور عرض گزار ہوئیں: ”اے ابا جان! لوگ یہ گمان کر رہے ہیں کہ یہ چھ افراد (خلافت کے لیے) پسندیدہ نہیں ہیں۔“
اس پر سیدنا عمر رضی اللہ عنہ نے فرمایا: ”مجھے ٹیک لگا کر بٹھاؤ۔“ پس لوگوں نے انہیں سہارا دے کر بٹھایا تو آپ رضی اللہ عنہ نے فرمایا: ”بھلا وہ علی بن ابی طالب رضی اللہ عنہ کے بارے میں کیا (اعتراض) کر سکتے ہیں؟! میں نے خود نبی کریم صلی اللہ علیہ وسلم کو یہ فرماتے ہوئے سنا ہے: ”اے علی! تمہارا ہاتھ میرے ہاتھ میں ہے، تم قیامت کے دن میرے ساتھ وہیں داخل ہو گے جہاں میں داخل ہوں گا۔“ وہ عثمان رضی اللہ عنہ کے بارے میں کیا کہہ سکتے ہیں؟! میں نے نبی کریم صلی اللہ علیہ وسلم کو فرماتے ہوئے سنا ہے: ”جس دن عثمان رضی اللہ عنہ وفات پائیں گے، آسمان کے فرشتے ان کی نمازِ جنازہ پڑھیں گے۔“ میں نے عرض کیا: اے اللہ کے رسول! کیا یہ فضیلت خاص طور پر عثمان کے لیے ہے یا سب لوگوں کے لیے عام ہے؟ آپ صلی اللہ علیہ وسلم نے فرمایا: ”یہ خاص طور پر عثمان رضی اللہ عنہ کے لیے ہے۔“ وہ طلحہ بن عبید اللہ رضی اللہ عنہ کے بارے میں کیا کہہ سکتے ہیں؟! میں نے ایک رات نبی کریم صلی اللہ علیہ وسلم کو اس وقت فرماتے سنا جب آپ صلی اللہ علیہ وسلم کا کجاوہ گر گیا تھا، آپ صلی اللہ علیہ وسلم نے فرمایا: ”کون ہے جو میرے لیے میرا کجاوہ درست کر دے اور اس کے عوض وہ جنت کا حقدار ہو جائے؟“ پس طلحہ بن عبید اللہ رضی اللہ عنہ فوراً لپکے اور انہوں نے آپ صلی اللہ علیہ وسلم کے لیے اسے درست کر دیا یہاں تک کہ آپ صلی اللہ علیہ وسلم سوار ہو گئے، تب نبی کریم صلی اللہ علیہ وسلم نے ان سے فرمایا: ”اے طلحہ! یہ جبرائیل علیہ السلام ہیں، وہ تمہیں سلام کہہ رہے ہیں اور فرما رہے ہیں کہ میں قیامت کی ہولناکیوں میں تمہارے ساتھ رہوں گا یہاں تک کہ تمہیں ان سے نجات دلا دوں۔“
وہ زبیر بن عوام رضی اللہ عنہ کے بارے میں کیا کہہ سکتے ہیں؟! میں نے نبی کریم صلی اللہ علیہ وسلم کو دیکھا کہ آپ صلی اللہ علیہ وسلم آرام فرما رہے تھے اور زبیر رضی اللہ عنہ بیٹھ کر آپ صلی اللہ علیہ وسلم کے چہرے سے (مکھیاں وغیرہ) ہٹا رہے تھے یہاں تک کہ جب آپ صلی اللہ علیہ وسلم بیدار ہوئے تو ان سے فرمایا: ”اے ابو عبداللہ! کیا تم مسلسل یہیں بیٹھے رہے؟“ انہوں نے عرض کیا: جی ہاں، میرے ماں باپ آپ پر قربان ہوں، میں مسلسل یہیں رہا۔ تب آپ صلی اللہ علیہ وسلم نے فرمایا: ”یہ جبرائیل علیہ السلام ہیں، تمہیں سلام کہتے ہیں اور فرماتے ہیں کہ میں قیامت کے دن تمہارے ساتھ ہوں گا یہاں تک کہ تمہارے چہرے سے آگ کی چنگاریوں کو دور ہٹاؤں گا۔“
وہ سعد بن ابی وقاص رضی اللہ عنہ کے بارے میں کیا کہہ سکتے ہیں؟! میں نے نبی کریم صلی اللہ علیہ وسلم کو غزوۂ بدر کے دن فرماتے سنا جبکہ آپ صلی اللہ علیہ وسلم نے اپنی کمان کی چودہ مرتبہ تانت چڑھائی تھی، آپ صلی اللہ علیہ وسلم وہ کمان انہیں تھماتے جاتے اور فرماتے تھے: «ارْمِ فِدَاكَ أَبِي وَأُمِّي» ”تم تیر چلاؤ، تم پر میرے ماں باپ قربان ہوں!“
اور وہ عبد الرحمٰن بن عوف رضی اللہ عنہ کے بارے میں کیا کہہ سکتے ہیں؟! میں نے نبی کریم صلی اللہ علیہ وسلم کو اس وقت دیکھا جب آپ سیدہ فاطمہ رضی اللہ عنہا کے گھر میں تشریف فرما تھے اور حسن و حسین رضی اللہ عنہما بھوک کی شدت سے رو رہے تھے اور تڑپ رہے تھے، تو نبی کریم صلی اللہ علیہ وسلم نے فرمایا: ”کون ہے جو ہمیں کچھ پہنچائے (کھلائے)؟“ اسی اثنا میں عبد الرحمٰن بن عوف رضی اللہ عنہ ایک پیالہ لے کر حاضر ہوئے جس میں حیس (کھجور، گھی اور پنیر کا حلوہ) تھا اور دو روٹیاں تھیں جن کے درمیان سالن (پگھلی ہوئی چربی) تھا، تو نبی کریم صلی اللہ علیہ وسلم نے ان سے فرمایا: ”اللہ تعالیٰ تمہاری دنیا کے معاملات کے لیے کافی ہو جائے، اور رہی تمہاری آخرت کی بات، تو اس کا میں ضامن ہوں۔“ [المطالب العالية بزوائد المسانيد الثمانية/كتاب المناقب/حدیث: 3992]