سیدنا نعمان بن بشیر رضی اللہ عنہ سے روایت ہے کہ رسول اللہ صلی اللہ علیہ وسلم نے ایک دیہاتی سے ایک گھوڑا خریدا، مگر وہ دیہاتی (اپنے قول سے) پھر گیا اور سودے کا انکار کرنے لگا، اس پر سیدنا خزیمہ بن ثابت رضی اللہ عنہ تشریف لائے اور فرمایا: ”اے دیہاتی! کیا تو (سودے سے) انکار کر رہا ہے؟ میں تیرے خلاف اس بات کی گواہی دیتا ہوں کہ تو نے یہ گھوڑا آپ صلی اللہ علیہ وسلم کے ہاتھ فروخت کیا ہے“۔ اس دیہاتی نے کہا: ”اگر خزیمہ بن ثابت میرے خلاف گواہی دیتے ہیں تو (مجھے منظور ہے، اب) مجھے میری قیمت ادا کر دیجیے“، تب رسول اللہ صلی اللہ علیہ وسلم نے (تعجب سے) دریافت فرمایا: ”اے خزیمہ! ہم نے تو تمہیں (اس وقت) گواہ نہیں بنایا تھا، پھر تم گواہی کیسے دے رہے ہو؟“ انہوں نے عرض کیا: ”میں آسمانی خبروں (وحی) کے معاملے میں آپ صلی اللہ علیہ وسلم کی کامل تصدیق کرتا ہوں، تو کیا اس دیہاتی کے معاملے میں آپ صلی اللہ علیہ وسلم کی بات کی تصدیق نہ کروں؟“ چنانچہ رسول اللہ صلی اللہ علیہ وسلم نے ان کی اکیلی گواہی کو دو مَردوں کی گواہی کے برابر قرار دے دیا۔
تاریخِ اسلام میں سیدنا خزیمہ بن ثابت رضی اللہ عنہ کے علاوہ کوئی ایسا شخص نہیں ہوا جس کی تنہا گواہی دو مَردوں کی گواہی کے قائم مقام اور شرعاً جائز قرار دی گئی ہو۔ [المطالب العالية بزوائد المسانيد الثمانية/كتاب المناقب/حدیث: 4020]