امام زہری رحمہ اللہ سے روایت ہے کہ انہوں نے بیان کیا: شیطان نے غزوۂ احد کے دن بلند آواز سے یہ پکارا: ”بے شک محمد ( صلی اللہ علیہ وسلم ) شہید کر دیے گئے ہیں۔“ سیدنا کعب بن مالک رضی اللہ عنہ بیان کرتے ہیں کہ (اس کڑے وقت میں) میں وہ پہلا شخص تھا جس نے رسول اللہ صلی اللہ علیہ وسلم کو پہچانا، میں نے خود (لوہے کی ٹوپی) کے نیچے سے آپ صلی اللہ علیہ وسلم کی مبارک آنکھیں دیکھیں، تو میں نے اپنی نہایت بلند آواز سے پکارا: ”لوگو! یہ رہے اللہ کے رسول صلی اللہ علیہ وسلم (یعنی آپ صلی اللہ علیہ وسلم زندہ سلامت ہیں)۔“ تو آپ صلی اللہ علیہ وسلم نے میری طرف اشارہ فرمایا کہ: ”خاموش ہو جاؤ۔“ پس اللہ عزوجل نے یہ آیت مبارکہ نازل فرمائی: ﴿وَمَا مُحَمَّدٌ إِلَّا رَسُولٌ قَدْ خَلَتْ مِن قَبْلِهِ الرُّسُلُ ۚ أَفَإِن مَّاتَ أَوْ قُتِلَ انقَلَبْتُمْ عَلَىٰ أَعْقَابِكُمْ﴾ [سورة آل عمران: 144] ”اور محمد ( صلی اللہ علیہ وسلم ) تو محض ایک رسول ہیں، ان سے پہلے بھی بہت سے رسول گزر چکے ہیں، تو کیا اگر ان کا انتقال ہو جائے یا وہ شہید کر دیے جائیں تو تم اپنی ایڑیوں کے بل (دوبارہ کفر کی طرف) پلٹ جاؤ گے؟“۔
اس کے راوی ثقہ ہیں، لیکن یہ روایت مرسل یا معضل ہے۔ [المطالب العالية بزوائد المسانيد الثمانية/كتاب السيرة والمغازي/حدیث: 4262]