سیدنا فضل بن عباس رضی اللہ عنہما سے روایت ہے، وہ بیان کرتے ہیں کہ میں نبی کریم صلی اللہ علیہ وسلم کی علالت کے دوران آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم کے سر مبارک پر سرخ رنگ کی پٹی بندھی ہوئی تھی، یا (راوی کو شک ہے کہ) شاید زرد رنگ کی پٹی تھی، پس آپ صلی اللہ علیہ وسلم نے فرمایا: ”اے میرے چچا زاد بھائی! اس پٹی کو تھامو اور اس کے ذریعے میرے سر کو مضبوطی سے باندھ دو۔“ میں نے اس کے ساتھ آپ صلی اللہ علیہ وسلم کے سر مبارک کو باندھ دیا، پھر آپ صلی اللہ علیہ وسلم نے مجھ پر سہارا لیا یہاں تک کہ ہم مسجد میں داخل ہوئے، پس آپ صلی اللہ علیہ وسلم نے (لوگوں کو مخاطب کر کے) ارشاد فرمایا: ”اے لوگو! بے شک میں بھی تمہاری طرح ایک انسان ہی ہوں، اور عین ممکن ہے کہ میرا تمہارے درمیان سے رخصت ہونے کا وقت قریب آ پہنچا ہو، پس اگر میں نے کسی کی عزت کو کوئی ٹھیس پہنچائی ہو، یا کسی کے بدن، بالوں یا مال کو کوئی نقصان پہنچایا ہو، تو یہ محمد ( صلی اللہ علیہ وسلم ) کی عزت، بال، بدن اور مال حاضر ہے، وہ شخص کھڑا ہو جائے اور (مجھ سے) اپنا بدلہ لے لے، اور تم میں سے کوئی ہرگز یہ نہ کہے کہ مجھے محمد ( صلی اللہ علیہ وسلم ) کی طرف سے دشمنی اور کینہ پروری کا ڈر ہے، خبردار! یہ دونوں باتیں نہ تو میری جبلت میں شامل ہیں اور نہ ہی میرے اخلاق کا حصہ ہیں۔“ راوی کہتے ہیں کہ پھر آپ صلی اللہ علیہ وسلم واپس تشریف لے گئے۔
جب اگلا دن ہوا تو میں پھر آپ صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم نے فرمایا: ”اے میرے چچا زاد بھائی! میرا نہیں خیال کہ میرا گزشتہ روز کا کھڑا ہونا (اور اعلان کرنا) میرے لیے کافی ہوا ہوگا، اس پٹی کو پکڑو اور اس سے میرا سر مضبوطی سے باندھ دو۔“ فضل کہتے ہیں کہ میں نے آپ صلی اللہ علیہ وسلم کا سر مبارک اس سے باندھ دیا، پھر نبی کریم صلی اللہ علیہ وسلم نے مجھ پر ٹیک لگائی یہاں تک کہ مسجد میں تشریف لائے اور وہی گفتگو فرمائی جو گزشتہ روز فرمائی تھی، پھر نبی کریم صلی اللہ علیہ وسلم نے مزید ارشاد فرمایا: ”تم میں سے ہمیں سب سے زیادہ محبوب وہ شخص ہے جو (اپنا حق ہو تو) بدلہ لے لے۔“ راوی کہتے ہیں کہ اس پر ایک شخص کھڑا ہوا اور عرض کیا: اے اللہ کے رسول! آپ کو یاد ہے جس دن ایک مانگنے والا آپ کے پاس آیا تھا اور اس نے آپ سے سوال کیا تھا، تو آپ صلی اللہ علیہ وسلم نے فرمایا تھا: ”کس کے پاس کچھ ہے جو ہمیں قرض دے سکے؟“ تو میں نے آپ کو تین درہم قرض دیے تھے۔ پس نبی کریم صلی اللہ علیہ وسلم نے فرمایا: ”اے فضل! اسے (وہ درہم) دے دو۔“ تو میں نے وہ اسے دے دیے۔ پھر نبی کریم صلی اللہ علیہ وسلم نے ارشاد فرمایا: ”جس شخص پر کوئی (اخلاقی یا جسمانی کمزوری) غالب ہو تو وہ ہم سے کہے تاکہ ہم اس کے لیے دعا کریں۔“ پس ایک شخص کھڑا ہوا اور عرض گزار ہوا: اے اللہ کے رسول! میں بزدل شخص ہوں اور بہت زیادہ سونے کا عادی ہوں، سیدنا فضل کہتے ہیں کہ (آپ صلی اللہ علیہ وسلم کی دعا کی برکت سے) پھر میں نے دیکھا کہ وہ شخص ہم سب سے زیادہ بہادر اور سب سے کم سونے والا بن گیا تھا۔
راوی بیان کرتے ہیں کہ پھر نبی کریم صلی اللہ علیہ وسلم سیدہ عائشہ رضی اللہ عنہا کے گھر تشریف لے گئے اور وہاں خواتین سے بھی ویسی ہی بات کہی جیسی مردوں سے کہی تھی۔ [المطالب العالية بزوائد المسانيد الثمانية/كتاب السيرة والمغازي/حدیث: 4322]