سیدنا علی بن ابی طالب رضی اللہ عنہ سے روایت ہے کہ (ایک مرتبہ جب) میں نے اپنا پاؤں رکاب میں ڈال رکھا تھا تو میرے پاس سیدنا عبداللہ بن سلام رضی اللہ عنہ آئے اور مجھ سے دریافت کیا: ”آپ کا کہاں جانے کا ارادہ ہے؟“ میں نے جواب دیا: ”عراق جانے کا۔“ انہوں نے کہا: ”دیکھیے! اگر آپ وہاں گئے تو یقیناً وہاں آپ کو تلوار کی کاٹ (ضرب) پہنچے گی۔“ سیدنا علی رضی اللہ عنہ نے فرمایا: ”اللہ کی قسم! میں نے ان سے پہلے رسول اللہ صلی اللہ علیہ وسلم کو بھی یہی بات فرماتے ہوئے سنا تھا۔“ (راوی ابوحرب کہتے ہیں کہ) میں نے اپنے والد کو یہ کہتے ہوئے سنا کہ مجھے اس بات پر سخت تعجب ہوا اور میں نے (دل میں) کہا: ”ایک جنگجو شخص اپنے ہی متعلق ایسی بات بیان کر رہا ہے!“
اس حدیث کو امام حمیدی، ابن ابی عمر، ابویعلی اور بزار نے سفیان کے واسطے سے روایت کیا ہے، امام بزار نے صراحت کی ہے کہ ہمارے علم کے مطابق اسے عبدالملک نے ابوحرب سے اور ان سے صرف ابن عیینہ نے روایت کیا ہے، نیز امام ابن حبان اور امام حاکم نے اسے صحیح قرار دیا ہے۔ [المطالب العالية بزوائد المسانيد الثمانية/كتاب الفتوح/حدیث: 4443]