سیدنا غرفہ بن حارث رضی اللہ عنہ، جنہیں (نبی کریم صلی اللہ علیہ وسلم کی) صحبت حاصل تھی اور جنہوں نے ارتداد (کے فتنے) کے دوران یمن میں عکرمہ بن ابی جہل رضی اللہ عنہ کے ساتھ مل کر قتال کیا تھا، ان کے پاس سے اہل مصر کا ایک نصرانی گزرا جسے مندقون کہا جاتا تھا، انہوں نے اسے اسلام کی دعوت دی تو اس نصرانی نے نبی کریم صلی اللہ علیہ وسلم کا ذکر کر کے آپ کی توہین کی، یہ بات عمرو بن العاص رضی اللہ عنہ تک پہنچائی گئی، تو انہوں نے سیدنا غرفہ رضی اللہ عنہ کو بلا بھیجا اور کہا: ہم نے تو انہیں عہد دے رکھا ہے۔ اس پر سیدنا غرفہ رضی اللہ عنہ نے فرمایا: ”اللہ کی پناہ کہ ہم نے انہیں یہ عہد و پیمان اس بات پر دیا ہو کہ وہ ہمیں اللہ اور اس کے رسول کے بارے میں تکلیف دیں، ہم نے تو انہیں اس بات پر عہد دیا ہے کہ ہم ان کے اور ان کے گرجاؤں کے درمیان رکاوٹ نہیں بنیں گے، وہ ان میں جو چاہیں کہیں، اور ہم انہیں ایسی ذمہ داری نہیں دیں گے جس کی وہ طاقت نہ رکھتے ہوں، اور ہم ان کی طرف سے (دشمن کے مقابلے میں) لڑیں گے، اور انہیں ان کے اپنے فیصلوں میں آزاد چھوڑا جائے گا، سوائے اس کے کہ وہ خود (ہمارے پاس) آئیں تو ہم ان کے درمیان اس کے مطابق فیصلہ کریں گے جو اللہ نے نازل فرمایا ہے۔“ عمرو بن العاص رضی اللہ عنہ نے کہا: تم نے سچ کہا۔ [المعجم الكبير للطبراني/باب الغين/حدیث: 15745]