مالک بن حمزہ بن ابی اسید ساعدی رحمہ اللہ، اپنے والد سے، وہ اپنے دادا ابواسید الساعدی رضی اللہ عنہ سے روایت کرتے ہیں، وہ کہتے ہیں کہ رسول اللہ صلی اللہ علیہ وسلم نے عباس بن عبدالمطلب سے فرمایا: ”اے ابوالفضل! تم اور تمہارے بیٹے کل اپنے گھر سے مت نکلنا جب تک میں تمہارے پاس نہ آ جاؤں۔“ چنانچہ وہ آپ صلی اللہ علیہ وسلم کا انتظار کرتے رہے یہاں تک کہ آپ صلی اللہ علیہ وسلم چاشت کے بعد تشریف لائے، ان کے پاس اندر گئے اور فرمایا: ”السلام علیکم۔“ انہوں نے کہا: وعلیکم السلام ورحمۃ اللہ وبرکاتہ۔ آپ صلی اللہ علیہ وسلم نے فرمایا: ”تم نے صبح کیسے کی؟“ انہوں نے کہا: بخیر، اللہ کا شکر ہے۔ آپ صلی اللہ علیہ وسلم نے فرمایا: ”قریب ہو جاؤ، قریب ہو جاؤ، قریب ہو جاؤ،“ ایک دوسرے کے قریب سرکتے رہو، یہاں تک کہ جب وہ اس قابل ہو گئے تو آپ صلی اللہ علیہ وسلم نے انہیں اپنی چادر میں لپیٹ لیا، پھر فرمایا: ”اے میرے رب! یہ میرے چچا اور میرے والد کے (سگے) بھائی ہیں، اور یہ میرے اہل بیت ہیں، انہیں آگ سے اسی طرح بچا لے جیسے میں نے انہیں اپنی اس چادر سے ڈھانپا ہے۔“ راوی کہتے ہیں: تو دروازے کی چوکھٹ اور گھر کی دیواروں نے آمین کہی، وہ کہنے لگیں: آمین، آمین، آمین۔ [المعجم الكبير للطبراني/باب الميم/حدیث: 16633]