محمد بن عمرو رحمہ اللہ اپنے والد سے، وہ اپنے دادا علقمہ بن وقاص رحمہ اللہ سے روایت کرتے ہیں، وہ کہتے ہیں: مؤذن نے معاویہ رضی اللہ عنہ کے پاس اذان دی تو کہا: ”اللہ اکبر اللہ اکبر“، تو معاویہ رضی اللہ عنہ نے فرمایا: ”اللہ اکبر اللہ اکبر“، پھر اس نے کہا: ”میں گواہی دیتا ہوں کہ اللہ کے سوا کوئی معبود نہیں“، انہوں نے کہا: ”میں گواہی دیتا ہوں کہ اللہ کے سوا کوئی معبود نہیں“، پھر اس نے کہا: ”میں گواہی دیتا ہوں کہ محمد ( صلی اللہ علیہ وسلم ) اللہ کے رسول ہیں“، انہوں نے کہا: ”میں گواہی دیتا ہوں کہ محمد ( صلی اللہ علیہ وسلم ) اللہ کے رسول ہیں“، پھر اس نے کہا: ”نماز کی طرف آؤ“، انہوں نے کہا: ”کوئی طاقت اور کوئی قوت نہیں مگر اللہ کی مدد سے“، اس نے کہا: ”کامیابی کی طرف آؤ“، انہوں نے کہا: ”کوئی طاقت اور کوئی قوت نہیں مگر اللہ کی مدد سے“، اس نے کہا: ”اللہ اکبر اللہ اکبر“، معاویہ رضی اللہ عنہ نے کہا: ”اللہ اکبر اللہ اکبر“، پھر اس نے کہا: ”اللہ کے سوا کوئی معبود نہیں“، تو انہوں نے کہا: ”اللہ کے سوا کوئی معبود نہیں“، پھر فرمایا: میں نے تمہارے نبی صلی اللہ علیہ وسلم کو اسی طرح کہتے سنا ہے۔ [المعجم الكبير للطبراني/باب الميم/حدیث: 16780]