سیدنا معاویہ بن حیدہ رضی اللہ عنہ بیان کرتے ہیں: میں رسول اللہ صلی اللہ علیہ وسلم کے پاس آیا اور عرض کیا: یا رسول اللہ! میں آپ کے پاس اس وقت تک نہیں آیا جب تک میں نے اپنی ان انگلیوں کی گنتی جتنی قسمیں نہیں کھا لیں کہ میں آپ کے پاس نہیں آؤں گا، تو اس ذات کی قسم جس نے آپ کو حق کے ساتھ بھیجا، اللہ نے آپ کو کس چیز کے ساتھ بھیجا ہے؟ آپ صلی اللہ علیہ وسلم نے فرمایا: ”اسلام کے ساتھ۔“ میں نے عرض کیا: اسلام کیا ہے؟ آپ صلی اللہ علیہ وسلم نے فرمایا: ”یہ کہ تم اپنا دل اللہ کے سپرد کر دو، اور اپنا رخ اللہ کی طرف کر لو، اور فرض نماز ادا کرو، اور فرض زکوٰۃ دو، (مسلمان آپس میں) دو بھائی اور مددگار ہیں، اللہ اس بندے کی توبہ قبول نہیں کرتا جو اپنے اسلام کے بعد شرک کر بیٹھے۔“
اور میں نے رسول اللہ صلی اللہ علیہ وسلم کو یہ فرماتے سنا: ”تم یہاں جمع کیے جاؤ گے“ - اور آپ صلی اللہ علیہ وسلم نے اپنے ہاتھ سے شام کی طرف اشارہ کیا - ”پیدل، سوار اور اپنے چہروں کے بل، تمہیں اللہ کے سامنے اس حال میں پیش کیا جائے گا کہ تمہارے منہ پر مہر لگی ہو گی، اور تم میں سے ہر ایک کے بارے میں سب سے پہلے اس کی ران گواہی دے گی۔“
اور میں نے رسول اللہ صلی اللہ علیہ وسلم کو یہ فرماتے سنا: ”تم ستر امتوں کی تعداد پوری کرتے ہو، تم ان سب میں سب سے آخری اور اللہ کے نزدیک سب سے معزز ہو۔“ [المعجم الكبير للطبراني/باب الميم/حدیث: 17085]