ابوسلمہ بن عبدالرحمن رحمہ اللہ سیدہ فاطمہ بنت قیس رضی اللہ عنہا سے روایت کرتے ہیں کہ ابوعمرو بن حفص نے اسے حتمی طلاق دے دی جبکہ وہ خود غائب تھا، تو اس نے اپنا وکیل کچھ جو دے کر بھیجا، تو وہ اس پر ناراض ہوئیں، اس نے کہا: اللہ کی قسم! تمہارا ہم پر کچھ حق نہیں، تو وہ رسول اللہ صلی اللہ علیہ وسلم کے پاس آئیں اور آپ سے یہ بات ذکر کی، آپ صلی اللہ علیہ وسلم نے فرمایا: ”تمہارے لیے نفقہ نہیں ہے۔“ پھر آپ صلی اللہ علیہ وسلم نے انہیں ام شریک کے گھر عدت گزارنے کا حکم دیا، پھر فرمایا: ”وہ ایسی عورت ہے جس کے ہاں میرے صحابہ آتے جاتے رہتے ہیں، تم ابن ام مکتوم کے گھر عدت گزارو، کیونکہ وہ ایک نابینا آدمی ہے، تم اپنے کپڑے اتار سکتی ہو، اور جب حلال ہو جاؤ تو مجھے بتانا۔“ فاطمہ رضی اللہ عنہا کہتی ہیں: جب میں حلال ہوئی تو میں نے آپ صلی اللہ علیہ وسلم سے ذکر کیا کہ معاویہ بن ابی سفیان اور ابوجہم بن حذیفہ نے مجھے پیغامِ نکاح بھیجا ہے، تو رسول اللہ صلی اللہ علیہ وسلم نے فرمایا: ”جہاں تک ابوجہم کا تعلق ہے تو وہ اپنی لاٹھی اپنے کندھے سے نہیں اتارتا، اور جہاں تک معاویہ کا تعلق ہے تو وہ نادار ہے، اس کے پاس مال نہیں، تم اسامہ بن زید سے نکاح کر لو۔“ فاطمہ کہتی ہیں: مجھے یہ ناپسند تھا، پھر آپ صلی اللہ علیہ وسلم نے دوبارہ فرمایا: ”اسامہ بن زید سے نکاح کر لو۔“ تو اللہ نے اس میں میرے لیے خیر رکھ دی اور مجھ پر (اس نکاح کی وجہ سے) رشک کیا جانے لگا۔ [المعجم الكبير للطبراني/مسند النساء/حدیث: 21281]