علی بن ابی طلحہ مولیٰ بنی امیہ کہتے ہیں: سیدنا معاویہ بن ابی سفیان رضی اللہ عنہ نے حج کیا اور ان کے ساتھ معاویہ بن حدیج نے بھی حج کیا، اور وہ سیدنا علی رضی اللہ عنہ کو سب سے زیادہ برا بھلا کہنے والوں میں سے تھا۔ وہ مدینہ میں رسول اللہ صلی اللہ علیہ وسلم کی مسجد سے گزرا جبکہ سیدنا حسن بن علی رضی اللہ عنہ اپنے ساتھیوں کی ایک جماعت میں بیٹھے تھے، تو ان سے کہا گیا: یہ معاویہ بن حدیج ہے جو سیدنا علی رضی اللہ عنہ کو گالیاں دیتا ہے۔ تو انہوں نے فرمایا: اس آدمی کو میرے پاس لاؤ۔ تو قاصد اس کے پاس آیا اور کہا: چلو، بلاوا ہے۔ اس نے کہا: کس کا؟ کہا: سیدنا حسن بن علی تمہیں بلا رہے ہیں۔ تو وہ ان کے پاس آیا اور انہیں سلام کیا، تو سیدنا حسن بن علی رضی اللہ عنہ نے اس سے فرمایا: کیا تم معاویہ بن حدیج ہو؟ اس نے کہا: ہاں۔ تو انہوں نے تین بار یہی پوچھا، پھر سیدنا حسن نے اس سے فرمایا: علی کو گالیاں دینے والا؟ تو وہ گویا شرمندہ ہو گیا، تو سیدنا حسن رضی اللہ عنہ نے اس سے فرمایا: ”سن لو، اللہ کی قسم! اگر تم حوض پر ان کے پاس پہنچے - اور میرا خیال نہیں کہ تم وہاں پہنچو گے - تو انہیں پاؤ گے کہ اپنا تہبند پنڈلی تک چڑھائے، منافقوں کو اجنبی اونٹ کی طرح دور بھگا رہے ہوں گے، یہ سچے اور تصدیق شدہ نبی صلی اللہ علیہ وسلم کا قول ہے، اور جس نے جھوٹ گھڑا وہ ناکام ہوا۔“ [المعجم الكبير للطبراني/باب الحاء/حدیث: 2745]