سیدنا ابوبکر صدیق رضی اللہ عنہ سے روایت ہے کہ انہوں نے ہمیں خطبہ دیا اور فرمایا: ”رسول اللہ صلی اللہ علیہ وسلم نے (ہجرت کے) پہلے سال ہمیں خطبہ ارشاد فرمایا تھا“، پھر سیدنا ابوبکر صدیق رضی اللہ عنہ (نبی صلی اللہ علیہ وسلم کی یاد میں) رو پڑے اور فرمایا: ”تم اللہ تعالیٰ سے عافیت طلب کرو: «سَلُوا اللَّهَ الْعَافِيَةَ» ”اللہ سے عافیت کا سوال کرو“، کیونکہ یقینِ کامل (ایمان) کے بعد دنیا میں کسی شخص کو عافیت سے بڑھ کر کوئی بہترین نعمت عطا نہیں کی گئی، آگاہ رہو! تم سچائی کو لازم پکڑو کیونکہ سچائی نیکی کے ساتھ ہے اور یہ دونوں جنت میں ہوں گے، اور تم جھوٹ سے دور رہو کیونکہ جھوٹ گناہ کے ساتھ ہے اور یہ دونوں جہنم میں ہوں گے، اور تم آپس میں قطع تعلق نہ کرو، نہ ایک دوسرے سے بغض رکھو اور نہ ہی آپس میں حسد کرو، بلکہ اللہ کے بندے اور بھائی بھائی بن کر رہو جیسا کہ اللہ تعالیٰ نے تمہیں حکم دیا ہے“۔ [مسند أبي يعلى الموصلي/مسند أبي بكر الصديق رضي الله عنه/حدیث: 121]